ჩვენი ქვეყანა არის დასახსნელი და ამ საქმეში გადადეთ პირადი დაპირისპირებები, გადადეთ პირადი სიმპათიები, გადადეთ ყველაფერი და გავერთიანდეთ, - ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა იუსტიციის სამინისტროსთან გამართულ აქციაზე განაცხადა.

მისივე თქმით, ქართველი ხალხი დაპირისპირებითა და დაყოფით დაიღალა.

„სახალხო პროტესტი დაატყდება თავს ბიძინა ივანიშვილს. მე ვიქნები ქართველ ხალხთან ერთად გარანტი, რომ დავაორგანიზებთ იმას, ბიძინა ივანიშვილს და მის მარიონეტულ რეჟიმს მოუწიოს გაქცევა პოლიტიკური თანამდებობიდან, მე ამის პირობას ვდებ“, - განაცხადა ხაბეიშვილმა.

მან საზოგადოებას და პოლიტიკოსებს გაერთიანებისკენ მოუწოდა.

„მოგმართავთ მათ შორის პოლიტიკურ ლიდერებს, პოლიტიკოსობა ნიშნავს ხალხის მსახურებას, პოლიტიკური ლიდერობა ნიშნავს, როცა გამოხატავ ხალხის ხმას და ჩვენს ხალხს დღეს შია, სწყურია, ემიგრაციაში გარბის, უსამართლობა აწუხებს, უსაფრთხოება აწუხებს, გარეთ რომ ვეღარ გამოდიან, ეშინიათ კრიმინალების, ქურდების, ხვალინდელი დღის“, - განაცხადა ხაბეიშვილმა.

მისი განმარტებით, ახლა ყველამ გვერდზე უნდა გადადოს პირადი წყენა და უთანხმოება.

„თქვენი ლაი-ლაი, ბლა-ბლა მობეზრდა ყველას. ჩვენი ქვეყანა არის დასახსნელი და ამ საქმეში გადადეთ პირადი დაპირისპირებები, გადადეთ პირადი სიმპათიები, გადადეთ ყველაფერი და გავერთიანდეთ მთავარი მიზნისთვის - ეს არის ჩვენი ქვეყნის ევროპული მომავალი, პრეზიდენტ სააკაშვილის გამოხსნა იმიტომ, რომ ეს ცალ-ცალკე არ გამოვა. ამას ხაბეიშვილი კი არ ამბობს, მსოფლიო ლიდერები ამბობენ“, -განაცხადა ხაბეიშვილმა.