ილია დარჩიაშვილი - ვაფასებთ ხორვატიის მხარდამჭერ პოზიციას, ხელი შეუწყოს საქართველოს ევროკავშირში გაწევრიანებას და გაგვიზიაროს საკუთარი გამოცდილება
დღევანდელ შეხვედრაზე ხორვატიამ კიდევ ერთხელ დაადასტურა საქართველოს ევროპულ და ევროატლანტიკურ სტრუქტურებში ინტეგრაციის მტკიცე მხარდაჭერა, - ამის შესახებ საქართველოს საგარეო საქმეთა მინისტრმა ილია დარჩიაშვილმა საქართველოში ვიზიტად მყოფ ხორვატიის საგარეო და ევროპულ საქმეთა მინისტრ, გორდან გრილიჩ რადმანთან შეხვედრის შემდეგ განაცხადა.
დარჩიაშვილი იმედოვნებს, რომ ახლო მომავალში ხორვატიის მხრიდან საქართველოს საინვესტიციო კლიმატის მიმართ დაინტერესება გაიზრდება.
„ხორვატ კოლეგასთან შეხვედრაზე მიმოვიხილეთ ორმხრივი და მრავალმხრივი ურთიერთობების დღის წესრიგში არსებული ყველა აქტუალური საკითხი. ხაზი გავუსვით მაღალი დონის პოლიტიკური დიალოგის აქტიურად გაგრძელების მნიშვნელობას, ასევე ვისაუბრეთ თანამშრომლობის გაღრმავების პერსპექტივებზე. აღსანიშნავია, სავაჭრო-ეკონომიკური მიმართულება. იმედს გამოვთქვამ, რომ ახლო მომავალში გაიზრდება ხორვატიულ კომპანიების დაინტერესება საქართველოს საინვესტიციო კლიმატით.
ხაზგასასმელია, რომ მინისტრის ვიზიტის ფარგლებში ხელი ეწერება ორ მნიშვნელოვან დოკუმენტს, შეთანხმებას ეკონომიკური თანამშრომლობის შესახებ და შეთანხმებას, რომელსაც უკვე მოეწერა ხელი, სამინისტროებს შორის თანამშრომლობას დიპლომატიური ტრენინგების მიმართულებით.
აღსანიშნავია, რომ დღევანდელ შეხვედრაზე ხორვატიამ კიდევ ერთხელ დაადასტურა საქართველოს ევროპულ და ევროატლანტიკურ სტრუქტურებში ინტეგრაციის მტკიცე მხარდაჭერა. ვაფასებთ ხორვატიის ამ მხარდამჭერ პოზიციას, ხელი შეუწყოს საქართველოს ევროკავშირში გაწევრიანებას და გაგვიზიაროს საკუთარი გამოცდილება. შეხვედრაზე განვიხილეთ საქართველოს პროგრესი მთელი რიგი პრიორიტეტების კუთხით, რომლის მიზანია ევროკავშირში გაწევრიანების შემდგომ ეტაპზე გადასვლა", - აღნიშნავს მინისტრი.
