ვაშაძის პარტიას თუ ფრაქციას, თუ რაც იყო, 2 წლის მანძილზე ისე ერქვა „სტრატეგია აღმაშენებელი“, რომ კითხვაც არ დასმულა ამასთან დაკავშირებით - ეს პოლიტიკური აჟიოტაჟი ღიმილისმომგვრელია, - ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა, რითაც პარლამენტის თავმჯდომარის განცხადებასთან დაკავშირებით დასმულ შეკითხვას უპასუხა, რა დროსაც შალვა პაპუაშვილმა „ქართული ოცნების“ ქმედებები დავით აღმაშენებლის პოლიტიკურ მიდგომებს შეადარა.

მისივე თქმით, პოლიტიკური შეფასებები, რომელიც პარლამენტის თავმჯდომარის განცხადებას მოყვა, ღიმილისმომგვრელია.

„როცა საუბარია იმაზე, რომ ჩვენ დავით აღმაშენებლის პრინციპებით უნდა ვიხელმძღვანელოთ და ამას მერე პოლიტიკური აჟიოტაჟი მოჰყვება, ღიმილისმომგვრელია. რა თქმა უნდა, ჩვენთვის სახელმძღვანელოა სწორედ ის პრინციპები, რომელიც დავით აღმაშენებლის, ამ უდიდესი მეფის მოღვაწეობას გასდევდა. ერთ-ერთი მთავარი პრინციპი სწორედ ეროვნული ინტერესების მაქსიმალური დაცვა იყო და ბუნებრივია, ამ პრინციპების ერთგულებაზეა საუბარი,“ - განაცხადა ირაკლი კობახიძემ.

ცნობისთვის, გუშინ, პარლამენტის პლენარულ სხდომაზე შალვა პაპუაშვილმა საკანონმდებლო ორგანოს საქმიანობის ანგარიშის წარდგენისას განაცხადა, რომ დავით აღმაშენებლის პოლიტიკურ მიდგომებს დღევანდელ პოლიტიკურ ლანდშაფტში ყველაზე მეტად „ქართული ოცნება“ განასახიერებს.