საქართველოს მესამე პრეზიდენტის მიხეილ სააკაშვილის გათავისუფლების მოთხოვნით, ქობულეთის მერიასთან „ერთიანი ნაციონალური მოძრაობის“ წევრები აქციას მართავენ.

როგორც „ნაციონალური მოძრაობის“ ქობულეთის ორგანიზაციის თავმჯდომარე ბონდო თედორაძემ განაცხადა, ხელისუფლებას მიხეილ სააკშვილის სიკვდილი აქვს დაგეგმილი.

„მიხეილ სააკაშვილის კლინიკაში გადაყვანის შემდეგ მისი მდგომარეობა უფრო დამძიმდა. ჩვენ არ ვართ მზად მიშას სიკვდილს შევეგუოთ. სახლში ჯდომის დრო არ არის“, - განაცხადა ბონდო თედორაძემ.

აქციის მიმდინარეობისას მცირე ინციდენტიც მოხდა. აქციის ერთ-ერთი მონაწილე მერიის შენობაში შესვლას ცდილობდა. მისი თქმით, მიხეილ სააკაშვილის პატიმრობასთან დაკავშირებით მმართველი გუნდის წევრებთან კითხვები ჰქონდა.

ქობულეთის მერიის შენობასთან მყოფმა სამართალდამცავებმა აქციის მონაწილეს შენობაში შესვლის შესაძლებლობა არ მისცეს.