“თავისუფლება მიშას“ - ამ მოწოდებით მარტვილში აქცია გაიმართა. „ერთიანი ნაციონალური მოძრაობის“ ლიდერებმა და მხარდამჭერებმა ჯერ ქუჩებში მსვლელობა მოაწყვეს, მოგვიანებით კი, მარტვილის ცენტრში შეიკრიბნენ.
აქციის მონაწილეები საქართველოს მესამე პრეზიდენტის გათავისუფლებას მოითხოვდნენ. მათი თქმით, ბრძოლა შედეგის მომტანი აუცილებელად იქნება.
„ამ ქვეყნის გადარჩენისთვის ბრძოლა აუცილებლად ეფექტური და შედეგის მომტანი იქნება. პროტესტი ყოველდღიურად უფრო და უფრო მძლავრი იქნება იმისთვის, რომ ამ ქვეყანაში ერთხელ და სამუდამოდ სიმართლემ უნდა დაისადგუროს. ამ ქვეყანაში სიკვდილით დასჯის განაჩენი არ უნდა გამოჰქონდეს არაფორმალურ ადამიანს, რომელსაც უზურპირებული აქვს სრულიად სახელმწიფო და ყველა სახელმწიფო ინსტიტუტი. ბიძინა ივანიშვილმა განიზრახა, რომ შური იძიოს მიხეილ სააკაშვილზე, მან არამხოლოდ პიროვნული შურისძიება, არამედ შური იძიოს იმ სახელმწიფოზე, იმ სახელმწიფოს განვითარებას შეუშალოს ხელი, რომლის აღმშენებლობაშიც მიხეილ სააკაშვილს მნიშვნელოვანი წვლილი აქვს შეტანილი. დარწმუნებული ვარ, პროტესტი იქნება მუდმივი, მწვავე, მანამ, ვიდრე არ გადარჩება ქვეყნის მესამე პრეზიდენტის სიცოცხლე და ეს ქვეყანა რუსული რეჟიმისგან არ გათავისუფლდება”, - განაცხადა „ერთიანი ნაციონალური მოძრაობის“ წევრმა გიორგი ბოტკოველმა.