ჟურნალისტის და გადაცემის ინტერესში თუ არ არის რესპონდენტის პასუხი, ჟურნალისტი განაგრძობს აგრესიულ ქმედებას რესპონდენტის მიმართ, ეს რესპონდენტი არც მეტი არც ნაკლები - პარლამენტის წევრია, პარლამენტის შენობაში ხდება პარლამენტის წევრის დევნა, - ამის შესახებ ჟურნალისტებთან პარლამენტის პირველმა ვიცე- სპიკერმა გია ვოლსკიმ განაცხადა.
ვოლსკი ამბობს, რომ რეგულაციების გარეშე პრობლემის მოგვარების მცდელობაც ჰქონდათ და შეზღუდვები ემოციურ ფონზე მიღებული გადაწყვეტილება არ არის.
ბრძანების და რეგულაციების გარეშე ამ პრობლემის მოგვარების მცდელობები იყო და ეს არ არის ერთ დღეში ან ემოციურ ფონზე მიღებული გადაწყვეტილება. ასეთი რეალობა შეიქმნა, როცა რესპონდენტი პასუხობს და თუკი კონკრეტულ ჟურნალისტს ან გადაცემის სარედაქციო პოლიტიკას არ შეესაბამება პასუხი, მათ ინტერესში არ არის ეს პასუხი, ჟურნალისტი განაგრძობს აგრესიულ ქმედებას რესპონდენტის მიმართ და ეს რესპონდენტი არის არც მეტი არც ნაკლები - პარლამენტის წევრი, პარლამენტის შენობაში ხდება პარლამენტის წევრის დევნა, არა მარტო დევნა, არამედ ფიზიკური დაპირისპირების პროვოცირება, მაგალითად, კარებში ფეხის ჩადგმა, ლიფტში ჩადგომა, რომ კარი არ დაიხუროს და ეს არ არის ერთი შემთხვევა მხოლოდ, ხშირად აქვს ადგილი და კონკრეტულ პოლიტიკურ მიზანს ემსახურება. ამის დარეგულირება და ცივილიზებულ ფორმაში გადაყვანა უნდა იყოს ორივე მხარის ინტერესში”, - განაცხადა ვოლსკიმ.
ინფორმაციისთვის, ჟურნალისტთა ქცევის წესებთან დაკავშირებით პარლამენტის თავმჯდომარე შალვა პაპუაშვილი არასამთავრობო სექტორის ნაწილის წარმომადგენლებს შეხვდა, თუმცა, მათი რეკომენდაციები და შენიშვნები არ გაიზიარა. აღნიშნულის შესახებ შეხვედრის დასრულების შემდეგ, ორგანიზაციების წარმომადგენლებმა განაცხადეს. როგორც მათ ჟურნალისტებთან განმარტეს, ქცევის წესებში ბევრი პრობლემური პუნქტია. პარლამენტში აკრედიტებული ჟურნალისტებისათვის ქცევის წესები პარლამენტის თავმჯდომარის ბრძანებით განისაზღვრა. ამავე ბრძანების საფუძველზე, ჟურნალისტებისათვის საპარლამენტო აკრედიტაციები კვლავ გაიცემა, რაც 2020 წლის მოწვევის პარლამენტში შეჩერებულია.
პარლამენტში აკრედიტებული ჟურნალისტური საქმიანობის ქცევის წესების მიხედვით, ჟურნალისტმა ხელი არ უნდა შეუშალოს პარლამენტში მიმდინარე ღონისძიებების მსვლელობას; წინასწარი ნებართვის გარეშე არ გადაიღოს პარლამენტის წევრის ან აპარატის თანამშრომლის სამუშაო ოთახი; პარლამენტის წევრის, აპარატის თანამშრომლის ან პარლამენტში სტუმრად მყოფი პირის მიერ ინტერვიუს ჩაწერაზე უარის თქმის შემთხვევაში, ინტერვიუ შეწყვიტოს; პარლამენტის წევრის, აპარატის თანამშრომლის ან პარლამენტში სტუმრად მყოფი პირის თანხმობის გარეშე არ გადაიღოს მისი დოკუმენტები, ტელეფონის ან სხვა ელექტრონული მოწყობილობის ეკრანი ისე, რომ მასზე გამოსახული ინფორმაციის აღქმა შესაძლებელი იყოს; არ დაუშვას მისი მხრიდან პარლამენტში მყოფი პირისადმი უხამსი, სექსისტური, დისკრიმინაციული მიმართვა ან მოქმედება; დაემორჩილოს სახელმწიფო დაცვის სამსახურის და მანდატურის მითითებებს; სააკრედიტაციო მასალა ატაროს გამოსაჩენ ადგილას და არ გადასცეს სხვა პირს. აღნიშნულ რეჟიმზე გადასვა 1-ელი მარტიდან მოხდება.