მარნეულის მერიის ინფორმაციით, ქვემო ქართლში, მარნეულის მუნიციპალიტეტის სოფელ სადახლოში, „ახალი სადახლოს სარწყავი სისტემის" მაგისტრალურ არხზე სარეაბილიტაციო სამუშაოები მიმდინარეობს.

ინფორმაციის თანახმად, მაგისტრალურ არხზე მოწყობილი წყალგამტარის რეაბილიტაცია ავარიული წყალსაგდების, ჩამქრობი ჭის, მილსადენისა და გაბიონის კედლების მოწყობას ითვალისწინებს.

„მარნეულის მუნიციპალიტეტის მერი კენან ომაროვი, მარნეულისა და გარდაბნის მაჟორიტარი დეპუტატი პარლამენტში ზაურ დარგალი, მარნეულის მუნიციპალიტეტის საკრებულოს თავმჯდომარე ამირან გიორგაძე და შპს „საქართველოს მელიორაციის" გენერალური დირექტორი თენგიზ ნასარიძე საირიგაციო სისტემის სარეაბილიტაციო და სამშენებლო პროცესს ადგილზე გაეცნენ.

ჩატარებული სამუშაოები სარწყავი სისტემის გამართულად ფუნქციონირებას უზრუნველყოფს. შედეგად, მუნიციპალიტეტში სასოფლო-სამეურნეო ფართობები შეფერხების გარეშე მოირწყვება.

პროექტი, რომლის ღირებულებაც 500 ათასი ლარია, 2022 წლის სექტემბერში დაიწყო და მიმდინარე წლის პირველ კვარტალში დასრულდება. სარეაბილიტაციო სამუშაოებს შპს „საქართველოს მელიორაცია" ახორციელებს”, - აღნიშნულია მარნეულის მერიის ინფორმაციაში.