ბიძინა ივანიშვილის დამარცხება ჩვენი ისტორიული მისიაა, - ამის შესახებ შეკვეთილში, ბიძინა ივანიშვილის რეზიდენციასთან მიმდინარე აქციაზე „ერთიანი ნაციონალური მოძრაობის“ თავმჯდომარეობის ყოფილმა კანდიდატმა, გიორგი მუმლაძემ განაცხადა.

მისივე თქმით, საქართველოს ყოფილი პრეზიდენტის, მიხეილ სააკაშვილის გადარჩენა „ჩვენი დემოკრატიული და ევროპული მომავლის გადარჩენას“ ნიშნავს.

„საქართველოს მთავარი მტერი არის ბიძინა ივანიშვილი, მას უნდა მივაკითხოთ ყველგან და მისმა გარემოცვამ უნდა იგრძნოს, რომ საქართველოს არ მოვაპარინებთ. საქართველო არის ჩვენი, ქართველი ხალხის და აქედან, რომ გარბიან ჩვენი მოქალაქეები ერთხელ და სამუდამოდ უნდა შევძლოთ, რომ დავიბრუნოთ ჩვენი ქვეყანა, სადაც ვიცხოვრებთ ბედნიერად, მშვიდად და მდიდრულად. ამიტომ ბიძინა ივანიშვილის დამარცხება ჩვენი ისტორიული მისიაა, რომ გადარჩეს მიშა სააკაშვილი, მიშას გადარჩენა კი ნიშნავს ჩვენი დემოკრატიული და ევროპული მომავლის გადარჩენას. ჩვენი შვილების მომავლისთვის ყველაფერს გავაკეთებთ, მივალთ ყველგან ვიბრძოლებთ ბოლომდე და საქართველო გახდება როგორც ევროკავშირის, ისე ნატო-ს წევრი. მაგრამ ეს უნდა დაიწყოს, პირველ რიგში, ბიძინა ივანიშვილის დამარცხებით და მიშას გათავისუფლებით“, - განაცხადა გიორგი მუმლაძემ.