შალვა პაპუაშვილი - მთელი უბედურება ისაა, რომ სააკაშვილი უფრო მეტს აინტერესებს, ვიდრე ამას საქართველო იმსახურებს - მისი მფარველები ქვეყნის წინააღმდეგ ახორციელებენ შეტევას პროპაგანდისტული ხერხებით თუ სხვა მხრივ
სასამართლომ იმსჯელა და დაადგინა, რომ მიხეილ სააკაშვილისთვის სასჯელის გადავადების არავითარი საფუძველი არ არსებობს - არსებობს ბევრი საფუძველი იმისა, ვთქვათ, რომ დანაშაულს სასჯელი უნდა მოჰყვეს! - ეს განცხადება ჟურნალისტებთან პარლამენტის თავმჯდომარემ შალვა პაპუაშვილმა ჟურნალისტებთან გააკეთა.
პაპუაშვილის შეფასებით, სააკაშვილისთვის სასჯელის გადავადების საკითხზე ერთ-ერთი ყველაზე უფრო გამჭვირვალე და სახალხო პროცესი წარიმართა, თითქმის ყველა მტკიცებულება გასაჯაროვდა და ღია სასამართლო პროცესის შედეგად დადგინდა, რომ სააკაშვილისთვის სასჯელის გადავადების საფუძველი არ არსებობს.
„სამწუხაროდ, მთელი უბედურება ის არის, რომ მიხეილ სააკაშვილი უფრო მეტს აინტერესებს, ვიდრე ამას საქართველო იმსახურებს. ვხედავთ, რომ მიხეილ სააკაშვილის მფარველები პირდაპირ საქართველო წინააღმდეგ ახორციელებენ შეტევას პროპაგანდისტული ხერხებით თუ სხვა მხრივ. ამის ერთადერთი მიზეზი არის ის, რომ სააკაშვილი მართლმსაჯულებისგან დაიხსნან. გასაოცარია რასაც ვუყურებთ - ამ საკითხში ჩართული არიან პოლიტიკოსები, არაპოლიტიკოსები... პირდაპირ არის მცდელობა იმისა, რომ შავზე თეთრი დაიძახონ. ქართველი ხალხი არ იჯერებს, რომ შავი არის თეთრი. ჩვენ როგორც ხელისფლება იმიტომაც ვართ მყარად, ისევე როგორც საზოგადოება, რომ ნამდვილად ვიცით, რომ შავი არის შავი! ამის გათეთრება არც მილიონ დოლარიანი კონტრაქტებით იქნება შესაძლებელი და არც სხვა გზებით. ერთი რამ საზოგადოებისთვის აშკარაა - მიხეილ სააკაშვილის მსხვერპლები იმ დამოკიდებულებას არ იმსახურებენ, რასაც სამწუხაროდ, დღეს-დღეობით ზოგიერთი უცხოელი მხარდამჭერი იჩენს“, - განაცხადა შალვა პაპუაშვილმა.
