აჭარის მაღალმთიან სოფლებში თოვლმა პრობლემები შექმნა
აჭარის მაღალმთიანი მუნიციპალიტეტების სოფლებში უხვმა ნალექმა პრობლემები შექმნა.
მაღალი ზონის სოფლებში თოვლის საფარი ერთ მეტრს აჭარბებს. ადგილობრივები შიდა სასოფლო გზების გაწმენდას ითხოვენ.
მათივე ინფორმაციით, უხვმა ნალექმა ელექტროგადამცემი სადენებიც დააზიანა.
მოსახლეობა დახმარებისთვის ადგილობრივ მთავრობას მიმართავს.
თავის მხრივ, აჭარის საავტომობილო გზების დეპარტამენტში აცხადებენ, რომ ოთხივე მუნიციპალიტეტში გაწმენდითი სამუშაოები დილიდან განახლდა.
„აჭარის საავტომობილო გზების დეპარტამენტმა ხულოს, შუახევის, ქედის, ხელვაჩაურისა და ქობულეთის მუნიციპალიტეტებში დილიდან განაახლა თოვლის საფარისაგან საავტომობილო გზების გაწმენდის სამუშაოები, რაშიც ჩართულია დეპარტამენტის 75 ერთეული სპეც-ტექნიკა და ადამიანური რესურსი. ამ ეტაპზე იწმინდება ადმინისტრაციულ ცენტრებთან დამაკავშირებელი საავტომობილო გზები”, - განაცხადეს უწყებაში.
