რუსთავში, შიდასაუბნო სივრცეების კეთილმოწყობის და ახალი რეკრეაციების შექმნის მიზნით დაწყებული პროექტები გრძელდება.

რუსთავის მუნიციპალიტეტის გამგეობის მიერ გავრცელებული ინფორმაციის მიხედვით, ჭყონდიდელის დასახლებაში, ჩეხოვის ქუჩაზე ახალი სკვერის მოწყობის სამუშაოები აქტიურად მიმდინარეობს. 1570 კვადრატულ მეტრ ფართობზე, მწვანე კუნძულები, საფეხმავლო ბილიკები, საბავშვო ატრაქციონები, სპორტული მოედანი და ფანჩატურები კეთდება. ახალი რეკრეაცია ადაპტირებული იქნება შეზღუდული შესაძლებლობების მქონე პირებისთვის.

გავრცელებული ინფორმაციის მიხედვით, ჩეხოვის ქუჩაზე ახალი სკვერის მოწყობის სამუშაოებს, რუსთავის მერი ნინო ლაცაბიძე, საკრებულოს ფრაქცია ,,ქართული ოცნების" წევრებთან და ინფრასტრუქტურის სამსახურის წარმომადგენლებთან ერთად გაეცნო.

„რუსთავში ვაგრძელებთ მნიშვნელოვანი ინფრასტრუქტურული პროექტების განხორციელებას. ცენტრალური ქუჩების რეაბილიტაციის პარალელურად, შიდა საუბნო სივრცეების მოწყობაც აქტიურად მიმდინარეობს. ჩეხოვის ქუჩაზე 1600-მდე კვადრატულ მეტრ ფართობზე, ახალი რეკრეაციული სივრცე ეწყობა. ეს ტერიტორია ფაქტობრივად უფუნქციო იყო, ჩვენ მოსახლეობასთან ერთად გადავწყვიტეთ, რომ აქ ახალი ღია საზოგადოებრივი სივრცე შეგვექმნა. სამუშაოების დასრულების შემდეგ, ამ უბნის მოსახლეობას, როგორც სპორტული მოედანი, ასევე საბავშვო-გასართობი და კომფორტული დასასვენებელი სივრცეც ექნება “, - განაცხადა რუსთავის მერმა ნინო ლაცაბიძემ.

როგორც რუსთავის საკრებულოს ფრაქცია „ქართული ოცნების“ წევრმა ზურაბ ტაბაღუამ განაცხადა, ახალი რეკრეაციის მოწყობის სამუშაოები, ჩეხოვის ქუჩაზე აპრილის ბოლოს დასრულდება.

„ჩვენ ძალიან ხშირი კომუნიკაცია გვაქვს მოსახლეობასთან და ამ სკვერის მოწყობის სამუშაოებიც სწორედ მათთან შეთანხმებით დაიგეგმა. მნიშვნელოვანია, რომ ცენტრალური ქუჩების პარალელურად ქალაქის შიდა უბნებშიც მოწესრიგდეს ინფრასტრუქტურა. სულ მალე, ჭყონდიდელის დასახლების ამ უბანს, კიდევ ერთი დასასვენებელი სივრცე შეემატება“, - განაცხადა რუსთავის საკრებულოს ფრაქცია „ქართული ოცნების“ წევრმა ზურაბ ტაბაღუამ.

ამ ეტაპზე, ახალ სკვერში დეკორატიული ღობის, მწვანე ზონებისა და ბილიკების მოწყობის სამუშაოები მიმდინარეობს, დასრულებულია მიწისქვეშა კომუნიკაციების და განათების სისტემის მონტაჟი.