ძალიან ცუდი და დამაზიანებელია ჩვენი ევროკავშირში ინტეგრაციის პროცესისთვის, როცა კრიტიკული რეზოლუცია მიიღება ევროპარლამენტის მიერ, - ასე შეაფასა „ლელოს“ ლიდერმა, ბადრი ჯაფარიძემ ევროპარლამენტში საქართველოს საკითხზე დღეს დაგეგმილი დებატები და რეზოლუციების კენჭისყრა.

როგორც მან ჟურნალისტებს განუცხადა, ევროპარლამენტარების კრიტიკის ნაცვლად, ხელისუფლება მათთან უნდა მუშაობდეს.

„განცხადებები, რომ ევროპარლამენტის რეზოლუციას ჩალის ფასი აქვს, არის არასერიოზულობის კიდევ ერთი გამოვლინება. ევროკავშირის აღმასრულებელი შტოს გადაწყვეტილებებზე გავლენას ახდენს ევროპარლამენტის რეზოლუციები, ამიტომ, სამწუხაროა, რომ კვლავ ვხედავთ ასეთი ტიპის კრიტიკულ რეზოლუციას, რომელიც ევროპარლამენტმა უნდა მიიღოს. ევროპარლამენტის წევრების ლანძღვა-გინების ნაცვლად, აუცილებელია მათთან კომუნიკაცია, ერთად განხილვა იმ პრობლემების, რომელიც ასეთი რეზოლუციის მიღებას იწვევს და პრობლემების აღმოფხვრა. შემდგომ ეს გაგვიხსნის კარს და უფრო მეტ მხარდაჭერას მივიღებთ ევროკავშირში ინტეგრაციის გზაზე“, - განაცხადა ჯაფარიძემ.

ცნობისთვის, ევროპარლამენტში საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებულ რეზოლუციას კენჭს დღეს უყრიან. შესაბამისი ინფორმაცია ევროპარლამენტის ვებგვერდზეა გამოქვეყნებული.

ევროპარლამენტში რეზოლუციის ხუთი ტექსტია წარდგენილი, რომელთაგან ორში ბიძინა ივანიშვილის შესახებაც არის საუბარი. ერთი ტექსტის ავტორია „ევროპის სახალხო პარტია“, მეორესი კი - „ევროპული კონსერვატორებისა და რეფორმისტების ჯგუფი“.