კახეთის სახელმწიფო რწმუნებულმა და საგარეჯოს მერმა სასწრაფო დახმარების ის ექიმები დააჯილდოვეს, რომლებიც 20 იანვრის ტრაგედიის ღამეს მორიგეობდნენ
კახეთის სახელმწიფო რწმუნებულმა, გიორგი ალადაშვილმა და საგარეჯოს მუნიციპალიტეტის მერმა, ავთანდილ გულიკაშვილმა საგარეჯოში, სასწრაფო სამედიცინო დახმარების ექიმები დააჯილდოვეს.
ამის შესახებ ინფორმაციას კახეთის მხარეში სახელმწიფო რწმუნებულის ადმინისტრაცია ავრცელებს.
მათივე ცნობით, ექიმებს ერთჯერადი ფულადი ჯილდო გადაეცათ.
„გიორგი ალადაშვილი და ავთანდილ გულიკაშვილი სასწრაფო სამედიცინო დახმარების იმ ექიმებს შეხვდნენ, რომლებიც მიმდინარე წლის 20 იანვარს, საგარეჯოში მომხდარი ტრაგედიის ღამეს მორიგეობდნენ და მათ მაღალ დონეზე შესრულებული პროფესიული საქმისთვის მადლობის სიგელები გადასცეს.
20 იანვრის ღამეს მორიგე სასწრაფო სამედიცინო დახმარების ექიმებს საგარეჯოს მუნიციპალიტეტის მერიის მხრიდან ერთჯერადი ფულადი ჯილდო გადაეცათ”, - ნათქვამია გავრცელებულ ინფორმაციაში.
