საქართველოს პარლამენტის იურიდიულ საკითხთა კომიტეტის თავმჯდომარე ანრი ოხანაშვილი გერმანიის ბუნდესტაგში სოციალ-დემოკრატიული პარტიის (SPD) ფრაქციის თავმჯდომარის მოადგილეს გაბრიელა ჰაინრიხს შეხვდა. ინფორმაციას საქართველოს პარლამენტი ავრცელებს.

მათივე ცნობით, გაცნობითი ხასიათის შეხვედრაზე ანრი ოხანაშვილმა სტუმარს ევროკავშირის რეკომენდაციების შესრულების პროცესში საქართველოს მიერ გადადგმული ნაბიჯებისა და მიღწეული პროგრესის შესახებ დეტალური ინფორმაცია მიაწოდა.

პარლამენტის ინფორმაციითვე, გაბრიელა ჰაინრიხმა მჭიდრო თანამშრომლობის მზაობა და საქართველოს ევროპულ ოჯახში ინტეგრაციის მიმართ გერმანიის მხარდაჭერა დაადასტურა.

„სტუმარს გავუზიარეთ ის პროგრესი, რომელსაც საქართველომ ბოლო წლებში საკანონმდებლო რეფორმების და ზოგადად, ევროკავშირთან და ევროპასთან დაახლოების თვალსაზრისით მიაღწია. მისი განწყობა არის პოზიტიური, მხარს უჭერს საქართველოსთვის კანდიდატის სტატუსის მონიჭებას. დაგვიდასტურა მჭიდრო თანამშრომლობის მზაობა და ის, რომ რჩება საქართველოს გულშემატკივრად,“ - განაცხადა ანრი ოხანაშვილმა.