ხულოს მუნიციპალიტეტის სოფლებში თოვლის საფარი სამ მეტრს აჭარბებს. მოსახლეობის ინფორმაციით, საავტომობილო მოძრაობა სოფლების მიმართულებით ჩაკეტილია. მათი თქმით, კურორტ გოდერძის მიმართულებით განსაკუთრებული პრობლემებია, უხვი ნალექის გამო გადაადგილება აკრძალულია.
შუახევის მუნიციპალიტეტის მცხოვრებლები კი ამბობენ, რომ თოვლმა ელექტროსადენები დააზიანა, რის გამოც რამდენიმე სოფელში დენის მიწოდება შეწყვეტილია.
აჭარის საავტომობილო გზების დეპარტამენტის განცხადებით, უწყება საგანგებო რეჟიმში მუშაობს.
„დიდთოვლობის გამო აჭარის საავტომობილო გზების დეპარტამენტი საგანგებო რეჟიმში განაგრძობს მუშაობას. რამდენიმე დღეა ხულოს, შუახევის, ქედის, ხელვაჩაურისა და ქობულეთის მუნიციპალიტეტებში აქტიურად გრძელდება გზების გაწმენდითი სამუშაოები.
სამუშაოებში ჩართულია დეპარტამენტის ბალანსზე არსებული ყველა სპეცტექნიკა.
პირველ რიგში იწმინდება ადმინისტრაციულ ცენტრებთან დამაკავშირებელი გზები.
მუნიციპალიტეტებში დიდთოვლობისა და უამინდობის გამო საავტომობილო მოძრაობა რეკომენდებულია მაღალი გამავლობის ავტომობილებით მოცურების საწინააღმდეგო ჯაჭვებით“, - განაცხადეს უწყებაში.