ეს კონტაქტები არ არის პირველი, როდესაც რუსეთთან არის ასეთი ურთიერთობები. ეს არის რუსეთის მიერ ოკუპირებული ტერიტორია საერთო ჯამში, - ასე უპასუხა პარლამენტის თავმჯდომარე შალვა პაპუაშვილმა კითხვას, რომელიც ოკუპირებული აფხაზეთის დე ფაქტო პრეზიდენტის, ასლან ბჟანიას მოსკოვში ვიზიტს და იმას შეეხებოდა, თუ რა იქნება ამაზე საქართველოს ხელისუფლების პასუხი.

როგორც პარლამენტის სპიკერმა აღნიშნა, სწორედ ეს არის ოკუპაციის სრული სისასტიკე, რომ საქართველოს ტერიტორიაზე რუსეთი თავისუფლად მოქმედებს.

„ეს მოვლენები რომ ხდება, ეს არის ოკუპაციის მთელი სისასტიკე, რომ ჩვენს ტერიტორიაზე რუსეთი თავისუფლად მოქმედებს, აქვს შეხვედრები და ა.შ. ერთადერთი პასუხი ამაზე არის არაღიარების მტკიცე პოლიტიკა, რომ ეს დარჩეს მხოლოდ რუსეთსა და მის მიერ ოკუპირებულ საქართველოს ტერიტორიებზე მისი საქმიანობის საკითხად. არაღიარების პოლიტიკა უნდა იყოს ძლიერი. მეორე, უნდა გაგრძელდეს წნეხი რუსეთზე იმისთვის, რომ დასრულდეს ოკუპაცია და მესამე, ეს არის სამშვიდობო პოლიტიკა ჩვენი თანამოქალაქეების მიმართ, რომლებიც იმყოფებიან ოკუპირებულ ტერიტორიაზე. ჩვენი თანამოქალაქეები თავადვე უნდა დარწმუნდნენ იმაში, რომ მნიშვნელოვანია ჩვენი საერთო სახელმწიფოს ტერიტორიისა და მისი მთლიანობის აღდგენა“, - განაცხადა შალვა პაპუაშვილმა.

შეგახსენებთ, ოკუპირებული აფხაზეთის ე.წ. „პრეზიდენტი“, ასლან ბჟანია მოსკოვში იმყოფება. ბჟანიას პრესსამსახურის ინფორმაციით, „სამუშაო ვიზიტის“ ფარგლებში ბჟანია რუსეთის პრეზიდენტის ადმინისტრაციაში შეხვედრებს გამართავს.