საქართველოს საგარეო უწყების ხელმძღვანელი ილია დარჩიაშვილი მიუნხენის კონფერენციის ფარგლებში ფინეთის საგარეო საქმეთა მინისტრს პეკკა ჰაავისტოს შეხვდა.

აღნიშნულთან დაკავშირებით ინფორმაციას საგარეო საქმეთა სამინისტრო ავრცელებს.

უწყების ცნობით, მინისტრებმა საქართველოს ევროპული და ევრო-ატლანტიკური ინტეგრაციის დღის წესრიგი მიმოიხილეს. საქართველოს საგარეო უწყების ხელმძღვანელმა კოლეგას ინფორმაცია მიაწოდა ევროკავშირში ინტეგრაციის გზაზე გაწეულ სამუშაოებზე, მათ შორის, ევროკომისიის 12 რეკომენდაციის შესრულების კუთხით.

„მხარეებმა მაღალი შეფასება მისცეს ევროკომისიის მიერ გამოქვეყნებულ შეფასების ანგარიშს და აღნიშნეს ის პროგრესი, რაც საქართველოს აქვს ამ გზაზე. ფინეთის მხრიდან კიდევ ერთხელ დადასტურდა ევროკავშირის გაფართოების პოლიტიკის და საქართველოს მისწრაფებების მხარდაჭერა. საუბარი შეეხო ნატოში ინტეგრაციას და ამ კუთხით ურთიერთგამოცდილების გაზიარებას.

შეხვედრაზე მინისტრებმა ყურადღება დაუთმეს უსაფრთხოების არსებულ გამოწვევებს და მათი გადაჭრის გზებს. ფინეთის მხრიდან კიდევ ერთხელ დაფიქსირდა საქართველოს სუვერენიტეტის და ტერიტორიული მთლიანობის მხარდაჭერა. ილია დარჩიაშვილმა კოლეგა ვიზიტით საქართველოში მოიწვია“, - ნათქვამია საგარეო საქმეთა სამინისტროს მიერ გავრცელებულ ინფორმაციაში.