გიორგი ვაშაძემ კი არა ახარა, არამედ იკითხა, რატომ მალავდნენ მოწვევას და უარის თქმის რა მოტივაცია არსებობდა, - ასე უპასუხა „სტრატეგია აღმაშენებლის“ ერთ-ერთმა ლიდერმა, პაატა მანჯგალაძემ საქართველოს პარლამენტის თავმჯდომარის შალვა პაპუაშვილის განცხადებას, რომ „ვაშაძემ გვახარა ინფორმაცია და მისი ავი სიხარული ხაზგასასმელია“.

როგორც მანჯგალაძემ „პალიტრანიუსის“ გადაცემა „რეზიუმეში“ განაცხადა, „ქართულ ოცნებას“ იმის წარმოჩენა უნდა, რომ „თუ ხელისუფლება უფრო არ წაიკუზება, რუსეთი გაღიზიანდება“.

„ქართული ოცნების“ მხრიდან ბოროტ მოქმედებას და უგუნურებას საზღვარი არ აქვს გიორგი ვაშაძემ კი არა ახარა, არამედ იკითხა, რატომ მალავდნენ ამ მოწვევას და უარის თქმის რა მოტივაცია არსებობდა. როდესაც რუსული აგრესიიდან ერთი წელი სრულდება, მთელი მსოფლიო სოლიდარულია უკრაინის მიმართ, ბელარუსს და რუსეთს არ ვგულისხმობ, ამ დროს საქართველოს დელეგაცია არ ჩადის.

შალვა პაპუაშვილი ომის დაწყებიდან რამდენიმე დღეში უკრაინაში ჩავიდა. ის განცხადებები უკვე გაკეთებული იყო, რასაც ეფარებიან. ამის მერე რა შეიცვალა? პირიქით, დასავლური მხარდაჭერა აშკარა გახდა, იმ ტექნიკასა და შეიარაღებაზე, რაზეც თავს იკავებდნენ, იმასაც აძლევენ უკრაინას. მიუნხენის სამიტზე გააკეთა განცხადება, რომ რუსეთს გამარჯვების უფლება არ აქვს, ამ დროს საქართველო ვის მხარეს არის?

დავუჯეროთ ირაკლი კობახიძეს და ვთქვათ, რუსეთს აქვს პროგრესი. თუ რუსეთი იმარჯვებს ბოროტების მხარეს გადავდივართ. თუ რუსეთი იმარჯვებს მხარს ვუჭერთ უკრაინელი ბავშვების მკვლელობას. ეს რა ხელისუფლებაა, რა მორალია? რა მოიგო ამით საქართველომ, ფრენები? ხელისუფლებას იმის წარმოჩენა უნდა, რომ თუ ხელისუფლება უფრო არ წაიკუზება, რუსეთი გაღიზიანდება. კიდევ რა დაგვრჩა დასათმობი?“,- განაცხადა მანჯგალაძემ.