ჩინეთის სახელმწიფო მრჩეველმა დამარწმუნა, რომ პეკინი რუსეთს იარაღს არ აწვდის. ამის შესახებ ევროკავშირის უმაღლესმა წარმომადგენელმა ჯოზეფ ბორელმა ბრიუსელში ნატო-ს გენერალურ მდივანთან იენს სტოლტენბერგთან და უკრაინის საგარეო საქმეთა მინსიტრთან დმიტრო კულებასთან სამმხრივი შეხვედრის შემდეგ გამართულ პრესკონფერენციაზე განაცხადა.
ბორელმა აღნიშნა, რომ ჯერ კიდევ ესპანეთის საგარეო საქმეთა მინისტრად მუშაობის პერიოდიდან ჩინეთის ყოფილ საგარეო საქმეთა მინისტრთან და ახლანდელ სახელმწიფო მრჩეველთან ვან ისთან “კარგი პირადი ურთიერთობები” აქვს შენარჩუნებული.
“გულწრფელი საუბარი გვქონდა მიუნხენში. მან სრულიად მკაფიოდ თქვა და მე შემიძლია მისი სიტყვები გავიმეორო: ჩინეთი არ აწვდის იარაღს ქვეყანას, რომელიც ომის მდგომარეობაში იმყოფება. ჩვენ არ ვაწვდით იარაღს რუსეთს და არ მივაწვდით იარაღს რუსეთს. ეს არის ის, რაც მან მითხრა და მკაფიოდ გაუსვა ხაზი, რომ ეს ჩინეთის საგარეო პოლიტიკის პრინციპია”, - თქვა ბორელმა.
ევროკავშირის უმაღლესი წარმომადგენლის თქმით, ვან იმ უკრაინისთვის შეიარაღების მიწოდებასთან დაკავშირებით მას შეშფოთების გამოხატვა სთხოვა.
“ავუხსენი დიდი განსხვავების შესახებ, ავუხსენი უკრაინაში ამ ომში, ჩვენთვის, ევროპელებისთვის, რა იმყოფება სასწორზე”, - თქვა ბორელმა.