გიორგი ხოჯევანიშვილს პარლამენტის წევრის უფლებამოსილება ვადამდე შეუწყდა

პარლამენტის წევრს, გიორგი ხოჯევანიშვილს დეპუტატის უფლებამოსილება, საკუთარი განცხადების საფუძველზე, ვადამდე შეუწყდა. საპროცედურო საკითხთა და წესების კომიტეტის თავმჯდომარის ირაკლი ქადაგიშვილის განცხადებით, კომიტეტმა განიხილა გიორგი ხოჯევანიშვილის განცხადება მისთვის უფლებამოსილების შეწყვეტის შესახებ და დაადგინა მისი ნამდვილობა.

„გიორგი ხოჯევანიშვილისთვის საქართველოს პარლამენტის წევრის უფლებამოსილების ვადამდე შეწყვეტის შესახებ“ პარლამენტის დადგენილების პროექტი 78 ხმით იქნა მიღებული.

ხოჯევანიშვილმა პარლამენტთან ერთად, პარტია "საქართველოც" დატოვა. აღნიშნული გადაწყვეტილების მიზეზად მან დაასახელა ის, რომ წინასაარჩევნო დაპირებების შესრულების შესაძლებლობა არ ეძლევა.

“ვტოვებ პარლამენტის წევრის მანდატს, ვწყვეტ პოლიტიკურ საქმიანობას და შესაბამისად, ვტოვებ პარტია “საქართველოსთვის“ რიგებს. ამ გადაწყვეტილების მიზეზი არის ერთადერთი გარემოება: - მაღალი პასუხისმგებლობის განცდა, რომელიც მაქვს ჩემი ამომრჩევლის წინაშე, როგორც გორისა და კასპის მაჟორიტარ დეპუტატს. სამწუხაროდ, დღევანდელი პოლიტიკური რეალობის გათვალისწინებით, არ მეძლევა საშუალება, ეფექტურად მოვახდინო ჩემი წინასაარჩევნო დაპირებების შესრულება, რაც ჩემი პირდაპირი მოვალეობაა. ჩემთვის, როგორც სახელმწიფო მოხელისთვის, ყოველთვის პრიორიტეტი იყო ხალხის ინტერესების მსახურება და არასდროს წარმოადგენდა რაიმე თანამდებობა თვითმიზანს… აქვე გარკვევით მინდა განვმარტო, რომ არ ვგეგმავ არანაირ პოლიტიკურ აქტივობას და ვაპირებ საქმიანობა გავაგრძელო კერძო სექტორში“, - დაწერა ხოჯევანიშვილმა სოციალურ ქსელში.