რიკოთის უღელტეხილზე საავტომობილო მოძრაობა შეფერხებულია

რიკოთის უღელტეხილზე საავტომობილო მოძრაობა რამდენიმე საათის განმავლობაში შეფერხებულია.

სოციალური ქსელის მომხმარებლები წერენ, რომ მათ რამდენიმე საათიან საცობში უწევთ ყოფნა და გზა ორივე მიმართულებით ჩახერგილია.

არსებული ინფორმაციით, ადგილზე ერთმანეთს 2 სატვირთო ავტომობილი დაეჯახა. ასევე ტერიტორიაზე ჩამოწვა მეწყერი, რამაც საავტომობილო მოძრაობის პარალიზება გამოიწვია.

როგორც "ინტერპრესნიუსისთვის" გახდა ცნობილი, შემთხვევის შედეგად არავინ დაშავებულა.

მოგვიანებით, რთული მეტეოროლოგიური პირობების, კერძოდ ინტენსიური თოვის, ქარბუქის, ლიპყინულის და ცუდი ხილვადობის გამო, საერთაშორისო მნიშვნელობის თბილისი–სენაკი–ლესელიძის საავტომობილო გზის კმ132–კმ163 (სურამის კვანძი-საქასრია) მონაკვეთზე აკრძალულია ყველა სახის ავტოტრანსპორტის მოძრაობა.