ევროპული საბჭო - ჩვენ უზრუნველვყოფთ უკრაინის გამარჯვებას - იმ დღემდე არ მოვისვენებთ
ჩვენ უზრუნველვყოფთ უკრაინის გამარჯვებას. ამის შესახებ უკრაინის წინააღმდეგ რუსეთის ომის დაწყებიდან ერთი წლის თავზე ევროპული საბჭოს მიერ გავრცელებულ გაცხადებაშია ნათქვამი.
განცხადებაში, რომელსაც ევროკავშირის ყველა წევრმა სახელმწიფომ დაუჭირა მხარი, ნათქვამია, რომ რუსეთის აგრესია დანაშაულია მშვიდობის წინააღმდეგ, არღვევს გაეროს ქარტიას, გაეროს პრინციპებსა და კაცობრიობის ფასეულობებს.
“რუსეთი სისტემატურად ესხმის თავს სამოქალაქო პირებს, ანადგურებს ქალაქებს და თავს ესხმის უკრაინულ იდენტობას. ჩვენ მზად ვართ უზრუნველვყოთ, რომ ყველა, ვინც პასუხისმგებელია ომის დანაშაულებზე და სხვა უმძიმეს დანაშაულებზე, რომლებიც ჩადენილია უკრაინის წინააღმდეგ რუსეთის აგრესიულ ომში, პასუხისმგებლობაში იქნას მიცემული”, - წერია განცხადებაში.
ევროკავშირის სახელმწიფოები პირობას დებენ, რომ უკრაინასთან და მის ხალხთან მყარად და სოლიდარობაში იმდენ ხანს იდგებიან, რამდენიც იქნება საჭირო.
“ყველა უკრაინელი იმსახურებს იმას, რომ მშვიდობაში იცხოვროს და თავისუფლად აირჩიოს საკუთარი ბედი. უკრაინა ჩვენი ევროპული ოჯახის წევრია”, - წერია განცხადებაში.
ევროკავშირის წევრი ქვეყნები აღნიშნავენ, რომ პრეზიდენტ ზელენსკის მშვიდობის ფორმულას უჭერენ მხარს და პირობას დებენ, რომ რუსეთის წინააღმდეგ უკრაინას გამარჯვების მიღწევაში დაეხმარებიან.
“ჩვენს საერთაშორისო პარტნიორებთან ერთად უზრუნველვყოფთ უკრაინის გამარჯვებას, საერთაშორისო სამართლისადმი პატივისცემას, მშვიდობის აღდგენასა და საერთაშორისოდ აღიარებულ ფარგლებში უკრაინის ტერიტორიული მთლიანობის აღდგენას, უკრაინის აღდგენას და სამართლიანობის დამყარებას. იმ დღემდე არ მოვისვენებთ”, - წერია განცხადებაში.
განცხადების თანახმად, ევროკავშირი უკრაინის პოლიტიკურ, ეკონომიკურ, ჰუმანიტარულ, საფინანსო და სამხედრო სფეროებში დახმარებას გააგრძელებს.
“ჩვენ ასევე მხარს დავუჭერთ უკრაინის აღდგენას, რისთვისაც ევროკავშირის კანონმდებლობასა და საერთაშორისო სამართალთან შესაბამისობაში ვეცდებით გაყინული და დაბლოკილი რუსული აქტივების გამოყენებას. გავაგრძელებთ რუსეთზე კოლექტიურ ზეწოლას მისი აგრესიული ომის შეწყვეტის მიზნით. ამ მიზნით სანქციების მეათე პაკეტს დავამტკიცებთ და ზომებს მივიღებთ მათ წინააღმდეგ, ვინც ეცდება ევროკავშირის ზომებისთვის გვერდის ავლას”, - წერია განცხადებაში.
