ქუთაისის მერმა იოსებ ხახალეიშვილმა 2022 წელს გაწეული მუშაობის ანგარიში წარადგინა და 2023 წელს მუნიციპალიტეტში დაგეგმილ პროექტებზე ისაუბრა. ამის შესახებ ინფორმაციას ქუთაისის მერია ავრცელებს.

მათი ცნობით, ქუთაისის საერთაშორისო უნივერსიტეტში გამართულ შეხვედრას ესწრებოდნენ ადგილობრივი ხელისუფლების, არასამთავრობო ორგანიზაციებისა და საზოგადოების წარმომადგენლები.

გაიმართა მერის მიერ 2022 წელს გაწეული მუშაობის ამსახველი ვიდეო-რგოლის პრეზენტაცია.

ქალაქის მერმა ისაუბრა 2022 წელს განხორციელებულ პროექტებზე, მუნიციპალურ და საერთაშორისო პროგრამებზე, მიღწეულ შედეგებსა და დაძლეულ გამოწვევებზე.

„2022 წელი ქუთაისისთვის უამრავი ახალი პროექტის და პროგრამის განხორციელების წელი იყო, რისი საშუალებაც გაზრდილმა ბიუჯეტმა მოგვცა. შევძელით გაგვეზარდა ყველა წარმატებული პროგრამის მოცულობა, დავაფინანსეთ რამდენიმე ახალი, მნიშვნელოვანი პროექტი, მათ შორის, ისეთები, რომლებიც წლების მანძილზე იყო მოსახლეობის დაკვეთა. აქტიურად ჩავერთეთ საერთაშორისო პროგრამებსა და ინიციატივებში.

დღეს, სწორედ ეს ანგარიში წარვუდგინეთ საზოგადოებას. ერთად ვნახეთ საანგარიშო ვიდეო-რგოლი და 2023 წელს ქუთაისის მუნიციპალიტეტში განსახორციელებელ პროექტებსა და პროგრამებზეც ვისაუბრეთ“, - განაცხადა იოსებ ხახალეიშვილმა.