დემონსტრაციულად არაფერს არ გააკეთებენ და შექმნიან დამატებით ბარიერებს ევროკავშირის გზაზე, ისინი ყველაფერს უყურებენ ასე: რა ახალი ბარიერი შევქმნათ, რომ არ მოგვცენ ევროკავშირის კანდიდატის სტატუსი, - ასე ეხმაურება „სტრატეგია აღმაშენებლის“ ერთ-ერთი ლიდერი, სერგო ჩიხლაძე „პალიტრანიუსის“ გადაცემა „360 გრადუსში“ საქართველოში ევროკავშირის ელჩის, პაველ ჰერჩინსკის მიერ მიხეილ სააკაშვილთან დაკავშირებით იუსტიციის მინისტრისთვის ევროკავშირის 27 ქვეყნის სახელით დემარშის გადაცემის ფაქტს.

სერგო ჩიხლაძის თქმით, „ქართული ოცნება“ განზრახ დგამს ანტიდემოკრატიულ ნაბიჯებს, რადგან 12 პუნქტის არ შესრულების მიუხედავად, გეოპოლიტიკური მდგომარეობიდან გამომდინარე ევროკავშირმა კანდიდატის სტატუსი მაინც არ მოგვანიჭოს.

„ეს არის ამ ქვეყნის უდიდესი პრობლემა და ტკივილი, რომ „ქართული ოცნება“, რომელიც მხოლოდ რუსეთიდან მიღებულ ინსტრუქციებს აღიარებს, წარმოადგენს საქართველოს ხელისუფლებას. გავიხსენოთ წინა ზაფხულის მოვლენები - ერთი გვარამიას დაპატიმრება და მეორე, ევროკავშირის მაშინდელი ელჩი, ევროპარლამენტარები ამბობდნენ, რომ არაფრით არ შეიძლება მოსმენების შესახებ კანონის ამ ფორმით მიღება. სპეციალურად ორივე გააკეთეს, რომ გაეფუჭებინათ პროცესი და პლუს ამას, მიაყოლეს ანტიდასავლური და ანტიევროპული რიტორიკა. მე დარწმუნებული ვარ, მაშინ რომ არ დაეჭირათ გვარამია, ანტიდასავლური, ანტიევროპული ისტერია რომ არ დაეწყოთ და იმ კანონებზე, მოსმენების შესახებ კანონზე განსაკუთრებით, ასევე საერთო მოსამართლეების შესახებ, საერთოდ პროცესი რომ გაეჩერებინათ, ჩვენ დიდი ალბათობით მოლდოვასთან და უკრაინასთან ერთად მივიღებდით კანდიდატის სტატუსს, მაგრამ სპეციალურად გააკეთეს ეს ყველაფერი. ახლა იმავეს აკეთებენ. ისინი ფიქრობენ, რომ მიუხედავად იმისა, რომ 12 პუნქტი არ შესრულდა და არც აპირებენ შესრულებას, ვაი და გეოპოლიტიკიდან გამომდინარე, მაინც მოგვცენ კანდიდატის სტატუსი?“, - განაცხადა სერგო ჩიხლაძემ.