ზურაბ აზარაშვილი გერმანიის ელჩს შეხვდა
საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, ზურაბ აზარაშვილი გერმანიის ფედერაციული რესპუბლიკის საგანგებო და სრულუფლებიან ელჩ, ერნსტ პეტერ ფიშერს შეხვდა.
უწყების ცნობით, შეხვედრაზე მხარეებმა, ერთობლივი პროექტები განიხილეს და მიმდინარე რეფორმებზე ისაუბრეს.
„ზურაბ აზარაშვილმა, დიპლომატს, ქვეყანაში მოქმედ, საყოველთაო ჯანდაცვის პროგრამაზე ინფორმაცია მიაწოდა. აღნიშნა, რომ სახელმწიფოს მთავარ მიზანს მოსახლეობის ჯანმრთელობის დაცვა, მათთვის სამედიცინო სერვისების გაუმჯობესება და მედიკამენტებზე ხელმისაწვდომობის გაზრდა წარმოადგენს. ჯანდაცვის მინისტრმა, გერმანიის ელჩს, ამ მიზნით, სამინისტროს მიერ გატარებული რეფორმები გააცნო. საუბარი შეეხო სამედიცინო დაწესებულებებში, მომსახურების დიაგნოზთან შეჭიდული ჯგუფებით (DRG) დაფინანსების ახალი მოდელის ამოქმედებას, ასევე მედიკამენტებზე რეფერენტული ფასების დაწესებას.
მხარეებმა, იძულებით გადაადგილებულ პირთა საკითხებზე, ამ მიმართულებით განხორციელებულ პროექტებსა და სამომავლო გეგმებზეც ისაუბრეს. ელჩმა ჯანდაცვის სამინისტროში მიმდინარე პროცესები დადებითად შეაფასა და თანამშრომლობის გაღრმავებისთვის მზადყოფნა გამოთქვა“, - აღნიშნულია გავრცელებულ ინფორმაციაში.
v-if="article.gallery" v-html="article.gallery"
