„საქართველოს ბანკის“ ყაჩაღობაში ბრალდებული ბადრი ესებუას საქმის პროკურორის, მირანდა წერეთლის განცხადებით, ბრალდების მხარე დღეს წარადგენს შუამდგომლობას განჩინების საფუძველზე მოპოვებული მტკიცებულებების დასაშვებობასთან დაკავშირებით.

მისივე თქმით, გაგრძელდება დაზარალებულთა გამოკითხვა.

"ბრალდების მხარე დღეს წარადგენს შუამდგომლობას განჩინების საფუძველზე მოპოვებული მტკიცებულებების დასაშვებობასთან დაკავშირებით, რის შემდგომაც გაგრძელდება საქმის განხილვა დაზარალებულთა გამოკითხვით. ოდოროლოგიური და ფონოსკოპიური ექსპერტიზისთვის საჭირო ნიმუშები უკვე აღებულია და ექსპერტიზა დანიშნულია, თუმცა ჯერ პასუხი არ არის", - განაცხადა მირანდა წერეთელმა.

ცნობისთვის, გამოძიების ინფორმაციით, ზუგდიდში, „საქართველოს ბანკის“ შენობაში 2020 წლის 21 ოქტომბერს შეიარაღებული ბადრი ესებუა შეიჭრა. მას მძევლად 40-ზე მეტი მოქალაქე ჰყავდა აყვანილი და მათი გათავისუფლების სანაცვლოდ 500 ათას აშშ დოლარს და უსაფრთხოების გარანტიებს ითხოვდა. თანხის გადაცემის შემდეგ თავდამსხმელმა გაქცევა მოახერხა. ბადრი ესებუა მიმდინარე წლის 8 თებერვალს დააკავეს.

აღნიშნულ საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.