უკრაინის თავდაცვის ძალებმა, გასული დღის განმავლობაში, 5 მიმართულებით მტრის 170-ზე მეტი შეტევა მოიგერიეს, - ინფორმაციას უკრაინის შეიარაღებული ძალების გენერალური შტაბი ავრცელებს.

„მტრის ძირითადი ძალისხმევა კონცენტრირებულია კუპიანსკის, ლიმანის, ბახმუტის, ავდიივკასა და შახტიორსკის მიმართულებებზე შეტევითი ოპერაციების ჩატარებაზე. გასული დღის განმავლობაში ჩვენმა დამცველებმა ამ მიმართულებებით მტრის 170-ზე მეტი შეტევა მოიგერიეს“, - აცხადებენ გენშტაბში.

უწყების ცნობით, რუსმა ოკუპანტებმა ხარკოვის, პოლტავასა და დონეცკის ოლქებში სამოქალაქო ინფრასტრუქტურის ობიექტებზე 14 სარაკეტო დარტყმა განახორციელეს. თავდასხმის შედეგად რამდენიმე მშვიდობიანი მოქალაქე დაშავდა, დაზიანდა საცხოვრებელი მაღალსართულიანი კორპუსები და კერძო სახლები.

ამასთან, გენშტაბში აცხადებენ, რომ რუსულმა ძალებმა, გასული დღის განმავლობაში, Shahed 136 დრონების გამოყენებით 21 საჰაერო დარტყმა განახორციელეს, მრავალჯერადი სარაკეტო სისტემებიდან კი ცეცხლი 58-ჯერ გახსნეს.

გენშტაბის ცნობით, უკრაინულმა ავიაციამ, საპასუხოდ, გასული დღის განმავლობაში მოწინააღმდეგეს პირად შემადგენლობასა და სამხედრო ტექნიკას 16 დარტყმა მიაყენა. ასევე, უკრაინელმა დამცველებმა მტრის Shahed-სა და Orlan 10-ის ტიპის დრონები ჩამოაგდეს.

გარდა ამისა, უკრაინის სარაკეტო და საარტილერიო დანაყოფებმა მოწინააღმდეგის კონცენტრაციის ადგილს, საბრძოლო მასალის 2 საცავსა და 3 სხვა მნიშვნელოვან სამიზნეს დაარტყეს.