პლენარული სხდომის დღეს, როცა რუსული კანონის დამტკიცებას გეგმავს "ქართული ოცნება", შევიკრიბოთ პარლამენტის წინ რაც შეიძლება მეტი ადამიანი - არ გაწიროთ საკუთარი შვილები ემიგრაციისთვის, არ გაწიროთ საკუთარი თავი, რომ დაბრუნდეთ იქ, საიდანაც ჩვენ გამოვედით 30 წლის წინ, როცა საბჭოთა კავშირი დაინგრა, - ეს განცხადება "ლელოს" დეპუტატმა სალომე სამადაშვილმა ჟურნალისტებთან გააკეთა.

როგორც მან აღნიშნა, დაიწყება აქტიური კამპანია და აქციის ზუსტი თარიღი გამოცხადდება მას შემდეგ, რაც ცნობილი გახდება, როდის გეგმავს "ქართული ოცნება" ე.წ. აგენტების შესახებ კანონპროექტების პირველი მოსმენით მიღებას.

"მინდა მივმართო საზოგადოებას, უკლებლივ ყველა მოქალაქეს, ვისაც სურს იცხოვროს თავისუფალ, ევროპულ საქართველოში, ჩვენ ვნახეთ, რომ რუსეთის საოკუპაციო რეჟიმი "ქართული ოცნების" სახით აპირებს პირველი მოსმენით დაამტკიცოს რუსული კანონი, ამის მიღება ნიშნავს დასრულებას ყველა ჩვენი გეგმის, რაც შეეხება ევროკავშირში ამ ქვეყნის მომავალს. ეს კანონი გამოიწვევს საზოგადოებაში განხეთქილებას და დაპირისპირებას, რაც ასევე რუსეთის გეგმაა. ამიტომ "ლელო" გამოდის ინიციატივით, გავერთიანდეთ ყველა, ვისაც მიაჩნია, რომ მისმა შვილმა თავისუფალ ქვეყანაში უნდა იცხოვროს და პლენარული სხდომის დღეს, როცა რუსული კანონის დამტკიცებას გეგმავს "ქართული ოცნება", შევიკრიბოთ პარლამენტის წინ რაც შეიძლება მეტი ადამიანი და ხმამაღლა ვუთხრათ მსოფლიოს, რომ ჩვენი არჩევანი არის ევროპა, თავისუფლება და არ ვაპირებთ, ეს ქვეყანა რუსულ საოკუპაციო რეჟიმს დავუთმოთ. ეს კანონი შეუძლებელს გახდის დაცულ, ევროპულ მომავალს, ყველას ვისაც თავისუფალ ქვეყანაში ცხოვრება უნდა, მოუწევს წასვლა ემიგრაციაში, არ გაწიროთ საკუთარი შვილები ემიგრაციისთვის, არ გაწიროთ საკუთარი თავი, რომ დაბრუნდეთ იქ, საიდანაც ჩვენ გამოვედით 30 წლის წინ, როცა საბჭოთა კავშირი დაინგრა ", - განაცხადა სალომე სამადაშვილმა.