ხულოს მუნიციპალიტეტში სოფელ დიაკონიძეებში ცენტრალურ საავტომობილო გზაზე მეწყერი ჩამოწვა. ხულოს მერიის ინფორმაციით, მეწყერმა მიმდებარე ტერიტორიაზე არსებული სასაფლაოები მოიყოლა.

უწყების ინფორმაციით, საფრთხის თავიდან აცილების მიზნით, ალტერნატიული შემოვლითი გზა მოეწყო.

“ჩატარებული სამუშაოების შედეგად, ბათუმი-ახალციხის საავტომობილო გზის 85 კმ-ზე სოფელ დიაკონიძეებში მაღალი გამავლობის ავტოტრანსპორტისათვის შემოვლითი გზით გადადგილება შესაძლებელია. აღნიშნულ საავტომობილო გზაზე, მეწყერი დღეს საღამოს განვითარდა, რამაც დროებით გამოიწვია ცენტრალური საავტომობილო გზის ჩაკეტვა. ასევე, მეწყერმა მოიყოლა მიმდებარე ტერიტორიაზე არსებული სასაფლაოები.

მეწყრული კერის შემდგომი გააქტიურებისა და საფრთხის თავიდან აცილების მიზნით, მოეწყო ალტერნატიული შემოვლითი გზა, რომლითაც მაღალი გამავლობის ავტომობილებით გადადგილება შესაძლებელია” , - განაცხადეს ხულოს მერიაში.