მოწმე ბადრი ესებუას საქმეზე - მანქანიდან გადასვლისთანავე რამდენჯერმე გაისროლა, სამსახურში წავედი და ხელმძღვანელს ვუთხარი, ყაჩაღი მივიყვანე ბანკში-მეთქი
ზუგდიდის რაიონულ სასამართლოში „საქართველოს ბანკის“ ყაჩაღობაში ბრალდებულ ბადრი ესებუას საქმეზე მიმდინარე სხდომაზე გამოიკითხა პირი, რომელმაც თავდამსხმელი „საქართველოს ბანკის“ ფილიალამდე მიიყვანა.
მოწმე დავით მატუამ სასამართლოს უთხრა, რომ სამხედრო ფორმაში გამოწყობილი, ნიღბიანი პირი გზაზე გადაუდგა და მანქანის გაჩერება მოსთხოვა.
მისივე თქმით, შეიარაღებული მამაკაცი ბანკთან ჩამოვიდა და მაშინვე ცეცხლი გახსნა.
„ახალ სოფლიდან ზუგდიდის მიმართულებით ვმოძრაობდი მანქანით, მდინარე ჯუმის ხიდამდე სამხედრო ფორმაში გამოწყობილმა პიროვნებამ გამაჩერა, წინ გადამიდგა, შავი ფერის ნიღაბი ეკეთა, თვალები შავად ჰქონდა შეღებილი, ხელში ავტომატის ტიპის იარაღი ეჭირა, ჩამიჯდა მანქანაში მითხრა გზას უყურეო. როცა მანქანაში ჩავისვი, ვიფიქრე, თანამშრომელია და ოპერაციაზე მიდის-მეთქი. მიმითითა, რომ რუსთაველის ქუჩით წავსულიყავი, მერე ბანკისკენ მიმითითა, კართან მიმაყვანინა მანქანა, გადმოვიდა, ვნახე , რომ ხელში ხელყუმბარა ეკავა, მანქანიდან გადასვლისთანავე რამდენჯერმე გაისროლა. მე სამსახურში წავედი და ხელმძღვანელს ვუთხარი ყაჩაღი მივიყვანე ბანკში-მეთქი”, - აღნიშნა დავით მატუამ.
დღევანდელ სასამართლო სხდომაზე ბრალდების მხარის მიერ წარმოდგენილი მოწმეების გამოკითხვა მიმდინარეობს.
ცნობისთვის, გამოძიების ინფორმაციით, ზუგდიდში, „საქართველოს ბანკის“ შენობაში 2020 წლის 21 ოქტომბერს შეიარაღებული ბადრი ესებუა შეიჭრა. მას მძევლად 40-ზე მეტი მოქალაქე ჰყავდა აყვანილი და მათი გათავისუფლების სანაცვლოდ 500 ათას აშშ დოლარს და უსაფრთხოების გარანტიებს ითხოვდა. თანხის გადაცემის შემდეგ თავდამსხმელმა გაქცევა მოახერხა. ბადრი ესებუა მიმდინარე წლის 8 თებერვალს დააკავეს. აღნიშნულ საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.
v-if="article.gallery" v-html="article.gallery"
