ეს არის პროცედურული ვირეშმაკობა, - ასე შეაფასა ოპოზიციონერმა დეპუტატმა რომან გოცირიძე მმართველი გუნდის ინიციატივა, ე.წ. უცხოური აგენტების შესახებ კანონპროექტი დღეს განიხილონ.

როგორც გოცირიძემ განმარტა, ახლა ხელისუფლების მთავარი ამოცანა აღნიშნული კანონპროექტის ცარიელ დარბაზში განხილვაა.

„ეს განხილვა სრულყოფილი ვერ იქნება, ვინაიდან 15:30 საათია, დებატები უნდა გაიმართოს ამ კანონთან დაკავშირებით, მით უმეტეს, უნდა ესწრებოდეს მთელი ოპოზიცია. თქვენ ისე გააკეთეთ, რომ ამ კანონის განხილვა ცარიელ დარბაზში ჩატარდეს, ეს არის პროცედურული ვირეშმაკობა, თქვენი მთავარი ამოცანა ახლა არის აიცილოთ ის ტკივილები, რომელსაც ყოველდღიურად იღებთ, აი, კატას რომ აჭრიან კუდს - ერთჯერ, ორჯერ, სამჯერ - არ ჯობს ერთხელ დავარტყათ და მოვიჭრათ ეს კუდიო, ამბობთ, კიდევ ხუთშაბათს გვინდა თავში გვირტყან, დაგვცინონ, გვატკინონო? დღეს ნაჯახით, ერთი ხელის მოსმით იჭრით კუდს, კუდიც მოჭრილი გაქვთ და თავიც საზოგადოების წინაშე. ვინ უნდა გენდოთ, როცა სიტყვის გამტეხები ხართ ყოველდღე?“, - განაცხადა რომან გოცირიძემ.