გორის მუნიციპალიტეტის მერი ვლადიმერ ხინჩეგაშვილი პროექტ LED-ის გუნდის ლიდერს საქართველოში მაიკლ ჰაინსს შეხვდა. ამის შესახებ ინფორმაციას გორის მუნიციპალიტეტის მერია ავრცელებს.

მათი ცნობით, შეხვედრა LED (ადგილობრივი ეკონომიკური განვითარება) პროექტთან დაკავშირებით გაიმართა, სადაც გორის მუნიციპალიტეტის ეკონომიკური პოტენციალისა და მისი განვითარების შესახებ ისაუბრეს.

„შეხვედრას ასევე ესწრებოდნენ პროექტის წარმომადგენლები გვანცა ირემაშვილი და ნინო მარკოზაშვილი, მერიისა და სტრატეგიული განვითარების სააგენტოს თანამშრომლები.

ვლადიმერ ხინჩეგაშვილმა მადლობა გადაუხადა პროექტის წარმომადგენლებს და თანამშრომლობას დაჰპირდა.

„ადგილობრივი ეკონომიკური განვითარების" მიზანია მუნიციპალიტეტში უფრო კონკურენტუნარიანი და ინოვაციური გარემოს შექმნა და სოფლად მცხოვრები მოსახლეობის ეკონომიკური გაძლიერება.

მუნიციპალიტეტების ეკონომიკური გაძლიერებისთვის, სხვადასხვა მეთოდებით მოხდება ადგილზე საჭიროებების შესწავლა და შემდგომ ამ საჭიროებებზე მუშაობა.

LED პროექტის ერთ-ერთ მთავარ მიზანს ასევე გადაწყვეტილების მიღების პროცესში კერძო, საჯარო და სამოქალაქო საზოგადოების ერთობლივი ჩართულობის მაჩვენებლის ზრდა წარმოადგენს. „ადგილობრივი ეკონომიკური განვითარების" პროექტი დაფინანსებულია შვეიცარიის განვითარებისა და თანამშრომლობის სააგენტოს მიერ.

პროექტს ახორციელებს შვეიცარიული ორგანიზაცია HELVETAS, გერმანულ საერთაშორისო საკონსულტაციო ორგანიზაცია WINS -თან პარტნიორობით“,- ნათქვამია ინფორმაციაში.