„წინ ევროპისკენ“, „განათლება ევროპაშია“, „ევროპა საქართველოს მომავალია“, „ბათუმი ევროპული ქალაქი“, - ამ ლოზუნგებით ბათუმში ევროპის მოედანზე საპროტესტო აქცია მიმდინარეობს. სხვადასხვა უმაღლესი სასწავლებლის სტუდენტები, არასამთავრობო ორგანიზაციების წარმომადგენლები, პოლიტიკური პარტიების წევრები და რიგითი მოქალაქეები შეიკრიბნენ და აგენტების შესახებ კანონპროექტს აპროტესტებენ. მათი მთავარი გზავნილია “არა რუსულ კანონს”.

შეკრებილები ამბობენ, რომ საქართველოში რუსული რეჟიმის დამყარებას არ შეეგუებიან.

„ყველა ერთად, რის გამოც აქ მოვედით, - ჩვენი ქვეყნის მომავალი საფრთხეშია. ქვეყანა ევროპული ღირებულებებით აღარ მიდის ევროპისკენ. დღეს უცხო ქვეყნის აგენტები ვართ. გუშინ და დღეს ხელისუფლების წარმომადგენლები ამბობენ, რომ ცოტანი ვართ, რაც ტყუილია. წლებია ვცდილობთ, ევროპული ღირებულებებით ვაშენოთ ჩვენი სახელმწიფო”,- განაცხადეს შეკრებილებმა.

აქციის მონაწილეებმა მანამდე, მსვლელობა ბათუმში, ქუჩებში მოაწყვეს შეძახილებით “არა რუსულ კანონს”.