„დაუყოვნებლივ ჩააგდონ რუსული კანონი” - ამ ლოზუნგით ბათუმში ევროპის მოედანზე მოქალაქეები საპროტესტო აქციას მართავენ.

როგორც შეკრებილები აცხადებენ, „რუსული კანონის წინააღმდეგ ბრძოლას ბოლომდე მიიყვანენ, რადგან ხელისუფლებას არ ენდობიან“.

“სახელმწიფო ხალხის მხარეს არასდროს ყოფილა, ხალხის მოთხოვნა არასდროს შეუსრულებიათ. მათი გადაწყვეტილება რიგითი ავანტიურაა, არ ვენდობით. “ქართული ოცნება” ხალხისთვის არ არის. არ გვჯერა, რომ დაპირებას შეასრულებს, ჩვენ გამოვალთ ქუჩაში. საქართველოს არ დავუთმობთ რუსულ რეჟიმს”, - აცხადებენ შეკრებილები.

აქციის მონაწილეები მიმართავენ ე.წ. აგენტების შესახებ კანონპროექტის მხარდამჭერ დეპუტატებს, დატოვონ მანდატები, რადგან აქციის მონაწილეებს მიაჩნიათ, რომ დეპუტატები "რუსეთის მითითებით მოქმედებენ".