ახალგაზრდებმა მიზანს მიაღწიეს - მათი მიზანი ხელისუფლების ცვლილება რომ ყოფილიყო, დღეს ხელისუფლება შეცვლილი იქნებოდა. ამ ახალგაზრდებს ვერ გააჩერებდა ვერავინ და ვერაფერი, - ამის შესახებ "გირჩი - მეტი თავისუფლების" ლიდერმა, ზურაბ ჯაფარიძემ განაცხადა, რითაც საქართველოს პრემიერ-მინისტრის, ირაკლი ღარიბაშვილის განცხადებები შეაფასა.

მისი თქმით, ირაკლი ღარიბაშვილს ახალგაზრდების მოტივაციები არ ესმის და ის, რომ ამ "ბოდვით" მათ ვერ შეაშინებს და ვერ გააჩერებს.

"მიზანს, რაც იყო, ახალგაზრდებმა მიაღწიეს და უკან დაახევინეს ივანიშვილის რეჟიმს, თავის ღარიბაშვილიან, კობახიძიან, ყველა მონებთან ერთად. რაც შეეხება ჩემს რაიმე ჩართულობას ამაში - მე ორი დღე ციხეში ვიჯექი, როცა ამ ახალგაზრდებმა ეს ბრძოლა მოიგეს. კომუნიკაციაც კი არ მქონდა არავისთან. რომ გამოვედი, უკვე გაფორმებული გამარჯვება დამხვდა. შესაბამისად, ვერაფრის კოორდინაციას ვერ გავაკეთებდი. ეს განცხადებები [ირაკლი ღარიბაშვილის] არის გათვლილი ახალგაზრდების მშობლებისადმი, რომ ისინი შეაშინონ, რომ თითქოს იქ რაღაცები ხდება, ვიღაცა ცუდი ხალხი მართავს ამ ახალგაზრდებს, რომ მერე იმათ გავლენა იქონიონ ახალგაზრდებზე, მაგრამ არ გამოვა. არ ესმის, ვინ არიან ეს ხალხი, ახალგაზრდებს ვგულისხმობ და არ ესმის მათი მოტივაციები. არ ესმის, რომ ამ ბოდვით მათ ვერ შეაშინებს და ვერ გააჩერებს," - განაცხადა ჯაფარიძემ.