ბათუმის მერის არჩილ ჩიქოვანის განცხადებით, ბულვარში მომხდარ ტრაგედიასთან დაკავშირებით შესაბამისი რეაგირება იქნება.

როგორც მან ჟურნალისტებს განუცხადა, მომხდარის ობიექტურ მიზეზებს გამოძიება დაადგენს.

“ძალიან სამწუხარო ფაქტი მოხდა. ვუსამძიმრებ მის ოჯახს. მეორე მცირეწლოვანს ვუსურვებთ გამოჯანმრთელებას.

გამოძიების ფარგლებში დაკავებულია ერთი პიროვნება. გამოძიების ინტერესებიდან გამომდინარე, შემდგომ საგამოძიებო მოქმედებებს ხელი რომ არ შეეშალოს, ინფორმაციის გაჟღერება არ შეგვიძლია, გამოძიება ობიექტურ მიზეზებს დაადგენს, თუ რის გამო მოხდა, აღნიშნული ტრაგედია და შესაბამისი რეაგირება იქნება”, - განაცხადა არჩილ ჩიქოვანმა

ბათუმში მომხდარი უბედური შემთხვევის ფაქტზე, რა დროსაც ე.წ. ბატუტის გადაბრუნების შედეგად ბავშვი გარდაიცვალა, პოლიციამ ერთი პირი დააკავა.

როგორც შინაგან საქმეთა სამინისტროს მიერ გავრცელებულ ინფორმაციაშია აღნიშნული, საგამოძიებო მოქმედებების შედეგად დადგინდა, რომ ბრალდებული პასუხისმგებელი იყო ბულვარში განთავსებული აღნიშნული ე.წ. ბატუტის უსაფრთხოებასა და ექსპლუატაციის წესების დაცვაზე, თუმცა მან დაკისრებული ვალდებულებების შესრულება ვერ უზრუნველყო.