ქუთაისი, ფეხბურთში 21 წლამდელთა ნაკრების ევროპის ჩემპიონატს უმასპინძლებს. ამის შესახებ ინფორმაციას ქუთაისის მერია ავრცელებს.

მათი ინფორმაციით, აღნიშნულ თარიღთან დაკავშირებით, მასპინძელ საქართველოს სამ ქალაქში - ქუთაისში, თბილისსა და ბათუმში ღონისძიებები გაიმართა და უკუთვლის საათები ჩაირთო.

მათივე ინფორმაციით, ქუთაისში ევროპის ჩემპიონატის უკუთვლის საათი ჩაირთო. ფეხბურთში 21 წლამდე ნაკრებთა ევროპის ჩემპიონატის დაწყებამდე 100 დღე დარჩა.

ღონისძიებაში მონაწილეობა მიიღეს: ქუთაისის მერმა იოსებ ხახალეიშვილმა; იმერეთში სახელმწიფო რწმუნებულმა, ზვიად შალამბერიძემ; საქართველოს ფეხბურთის ფედერაციის ვიცე-პრეზიდენტმა, ალექსანდრე იაშვილმა; ვეტერანმა და ახალგაზრდა ფეხბურთელებმა, ჩემპიონატის პარტნიორი კომპანიების წარმომადგენლებმა.

"ზუსტად 100 დღეში ქუთაისი დიდ ფეხბურთს უმასპინძლებს. ჩვენთვის დიდი პატივი და ამასთანავე, უდიდესი პასუხისმგებლობაა საქართველოს და რუმინეთის სხვა ქალაქებთან ერთად ვუმასპინძლოთ 21 წლამდე ნაკრებთა ევროპის ჩემპიონატს.

მსოფლიოს ერთ-ერთი უძველესი ქალაქი ქუთაისი საუკეთესო სპორტული ტრადიციების ქალაქია. აქ დაიწყო არაერთი ცნობილი ქართველი სპორტსმენის წარმატებული კარიერა და მათ შორის დიდი ქართველი ფეხბურთელების. აქ დღესაც იზრდება იმედის მომცემი ახალი თაობა ფეხბურთელებისა და პირველ რიგში, სწორედ მათთვის იქნება სტიმული ის, რომ სწორედ ჩვენი ქალაქი მასპინძლობს უმაღლესი დონის საერთაშორისო საფეხბურთო ჩემპიონატს.

განსაკუთრებულად ემზადება ქუთაისი ევროპის ჩემპიონატის მასპინძლობისთვის. მიმდინარეობს შესაბამისი ინფრასტრუქტურის სრულყოფა, რათა ჩემპიონატის მონაწილეებს, მათ ქომაგებს და ჩვენი ქალაქის ყველა სტუმარს სათანადოდ დავხვდეთ.

დროის ათვლა დაიწყო! ქუთაისი გელოდებათ!

წარმატებულ, საინტერესო და დასამახსოვრებელ ევროპის ჩემპიონატს გისურვებთ!", - განაცხადა იოსებ ხახალეიშვილმა.