პარლამენტის ოპოზიციონერი წევრები თამარ კორძაია და ხატია დეკანოიძე საქართველოში მოქმედ უნივერსიტეტებს "თავისუფალი უნივერსიტეტისა" და "საქართველოს უნივერსიტეტის" სოლიდარობისკენ მოუწოდებენ.
მათი განცხადებით, საპროტესტო აქციებით გაბრაზებული ხელისუფლება ახლა განტევების ვაცს ეძებს და რეპრესიებს იწყებს.
როგორც პარლამენტში გამართულ ერთობლივ პრესკონფერენციაზე ითქვა, ცალსახად და ნათლად ჩანს "ქართული ოცნების" შურისძიებისა და თავისუფალი სივრცეების შეზღუდვის სურვილი.
"ქართული ოცნება" თავისუფალ უნივერსიტეტსა და საქართველოს უნივერსიტეტზე თავდასხმით იმ თავისუფალი სივრცეებზე შეტევას ცდილობს, სადაც ადამიანები ცდილობენ მიიღონ განათლება და დემოკრატიულ ღირებულებებს ეზიარონ. ეს შეტევა სწორედ თავისუფალი ადამიანების გაქრობას ისახავს მიზნად.
მოვუწოდებ ყველა უნივერსიტეტს, ამ ორი უნივერსიტეტის მიმართ სოლიდარობა გამოიჩინონ, რადგან თუ დღეს ჩვენ გავჩუმდებით, ხვალ ეს ხელისუფლება ყველა უნივერსიტეტს მიადგება.
ხელისუფლება არის გაბრაზებული და ეძებს მიზეზებს, რათა ვიღაცები დასაჯოს. "ქართული ოცნება" არ ახდენს საკუთარ შეცდომებზე რეფლექსიას და გადასულია რეპრესიებზე", - განაცხადა თამარ კორძაიამ.
ხატია დეკანოიძის თქმით, აღნიშნულ უნივერსიტეტებში განათლებული და პატრიოტი თაობა სწავლობს, ხოლო თაობას, რომელიც კარგად სწავლობს, განათლებას იღებს, თან მუშაობს და დოვლათს ქმნის, ხელისუფლება საფრთხედ მიიჩნევს.
"საპროტესტო აქციების შემდეგ ხელისუფლების პირველი ნაბიჯი იყო დარტყმა განათლებასა და უნივერსიტეტებზე. "ფრანკლინის კლუბში" ბავშვები ცოდნას სხვადასხვა დისციპლინაში იღებენ. ამიტომ მათი შემდეგი ნაბიჯია განათლებასა და თავისუფალ სივრცეებზე დარტყმა", - განაცხადა ხატია დეკანოიძემ.
