ანრი ოხანაშვილი - ველოდებით ოპოზიციის რადიკალურ ჯგუფებს, რომლებიც ამბობენ, რომ აქვთ ფაქტი, რაც სასამართლოზე ნეგატიურ შეფასებას ადასტურებს - მოიტანონ და დადონ
ველოდებით ოპოზიციის რადიკალურ ჯგუფებს, რომლებიც ამბობენ, რომ რაღაც ფაქტი აქვთ რაც სასამართლოზე ნეგატიურ შეფასებას ადასტურებს - მოიტანონ და დადონ, ასევე დადონ საერთაშორისო სტანდარტის შესაბამისი ნაბიჯი, თუ როგორ უნდა გადაიჭრას კონკრეტული საკითხები , - ამის შესახებ პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა განაცხადა.
ოხანაშვილის მტკიცებით, "საერთო სასამართლოების შესახებ" კანონში დაგეგმილი ცვლილებების პროექტი ვენეციის კომისიამ პოზიტიურად შეაფასა.
"რადიკალური ოპოზიციის სახე სხვა რა უნდა იყოს, გარდა იმისა, რომ რაც არ უნდა პოზიტიური იყოს საკითხი, მაინც ნეგატიურად წამოაჩინოს
მათ არ უხარიათ, როცა ვენეციის კომისია კონკრეტულ საკითხზე პოზიტიურ შეფასებას აკეთებს და არაფერს ამბობენ იმ პოზიტიურ შეფასებებზე, რომელიც სასარგებლო და სასიკეთოა ქვეყნისთვის. მათი მიზანია, რომ მათივე ქვეყანა რაც შეიძლება ცუდად წარმოაჩინონ.
"საერთო სასამართლოების შესახებ" კანონში დაგეგმილი ცვლილებების პროექტი ვენეციის კომისიის მიერ პოზიტიურად არის შეფასებული. ამასთანავე ნათქვამია, რომ საჭიროა გაგრძელდეს ადრინდელი რეკომენდაციებზე მსჯელობა, რაც აქამდე არ შესრულებულა, თუმცა ჩვენგან მიიღეს არგუმენტი, რომ მთელ რიგ რეკომენდაციებთან დაკავშირებული საკითხები საკონსტიტუციო სასამართლოშია გასაჩივრებული და ჩვენი მიზანია, მისი ერთხელ და სამუდამოდ კონსტიტუციურ სამართლებრივად გადაჭრა.
ვენეციის კომისიამ ასევე თქვა, რომ სხვადასხვა საუბრებში დაფიქსირდა პოზიცია, რომ სასამართლოში არის კორპორატივიზმის რისკები. ამაზე ვენეციის კომისიამ მოგვიწოდა, რომ თუ ასეთი რისკები არის, გაიმართოს მსჯელობა და გადაიდგას შესაბამისი ნაბიჯები.
ველოდებით ოპოზიციის რადიკალურ ჯგუფებს, რომლებიც ამბობენ, რომ რაღაც ფაქტი აქვთ რაც სასამართლოზე ნეგატიურ შეფასებას ადასტურებს - მოიტანონ და დადონ, ასევე დადონ საერთაშორისო სტანდარტის შესაბამისი ნაბიჯი, თუ როგორ უნდა გადაიჭრას კონკრეტული საკითხები", - განაცხადა ანრი ოხანაშვილმა.
