ვანო მერაბიშვილი - საქართველოში რეალურად ერთი სერიოზული ოპოზიციური პარტიაა, „ერთიანი ნაციონალური მოძრაობა“ - ყველაფერი შეიცვალა და იმედი მაქვს, მომდევნო თვეებში უფრო რეალურ პროცესს ნახავთ, მათ შორის ქუჩაშიც

საქართველოში რეალურად ერთი სერიოზული ოპოზიციური პარტიაა, „ერთიანი ნაციონალური მოძრაობა“, სააკაშვილის პარტია. მისი რეიტინგი ორჯერ მეტია ვიდრე ყველა სხვა დანარჩენი ოპოზიციური პარტიის რეიტინგი ერთად, - ამის შესახებ საქართველოს შინაგან საქმეთა ყოფილმა მინისტრმა, ვანო მერაბიშვილმა უკრაინულ მედიასთან განაცხადა.

მან „ნაციონალურ მოძრაობაში“ ჩატარებულ თავმჯდომარის არჩევნებზე ისაუბრა და აღნიშნა, რომ არჩევნების შემდეგ ყველაფერი შეიცვალა და პარტია მნიშვნელოვნად გააქტიურდა.

„ამ პარტიაში ხელმძღვანელობის ვადამდელი არჩევნები გაიმართა, რადგან ჩვენი პარტიის ყოფილი ხელმძღვანელობა, რბილად რომ ვთქვათ, ძალიან პასიურად მოქმედებდა, პრაქტიკულად, არ რეაგირებდა არც უკრაინის ომზე, არც არაფერზე. ეს ჩემი სუბიექტური აზრია და ძალიან ახალგაზრდა, საინტერესო ადამიანებმა პროვოცირება მოახდინეს ვადამდელ არჩევნებზე და პარტიის მოქმედმა თავმჯდომარემ წააგო ეს არჩევნები. არჩევნები ელექტრონული წესით ჩატარდა. დაახლოებით, 50 000 ადამიანი ელექტრონულად დარეგისტრირდა არჩევნებზე მთელი საქართველოს მასშტაბით. მოქმედი თავმჯდომარე ახალგაზრდასთან დამარცხდა და თუ აკვირდებით ყველაფერი ძალიან შეიცვალა. საქართველოში ძალიან ბევრი აქცია მიმდინარეობს, ხდება პარტიის აღდგენა, რადგან ბევრი წლის განმავლობაში „ერთიანი ნაციონალური მოძრაობის" ლიდერები ცდილობდნენ არა მხოლოდ იმას, რომ არ გაეპროტესტებინათ რამე, არამედ ზოგჯერ ისინი იმასაც კი ცდილობდნენ, რომ სპონტანურად დაწყებული საპროტესტო აქციები არ განევითარებინათ, რბილად რომ ვთქვათ. ახლა ყველაფერი შეიცვალა და იმედი მაქვს, მომდევნო თვეებში თქვენ უფრო რეალურ პროცესს ნახავთ, მათ შორის ქუჩაშიც“, - აცხადებს ვანო მერაბიშვილი.