ელენე ხოშტარია - „ქართული ოცნება“ კლავს ისტორიულ შანსს, გავხდეთ ევროპული ოჯახის წევრი

პარტია „დროას“ ლიდერის ელენე ხოშტარიას განცხადებით, ხელისუფლება კლავს საქართველოს ისტორიულ შანსს, რომ ქვეყანა ევროპული ოჯახის წევრი გახდეს. როგორც მან პრესკონფერენციაზე აღნიშნა, საზოგადოების ერთიანობით, კონსოლიდაციითა და პროტესტით ხელისუფლებას დათმობაზე წასვლა მოუწევს.

„ქართული ოცნება“ კლავს ჩვენს ისტორიულ შანსს, გავხდეთ ევროპული ოჯახის წევრი, მაგრამ ჩვენ, საქართველოს მოქალაქეები, პოლიტიკოსები, საზოგადო მოღვაწეები, ყველა, ვინც ამ ქვეყანას გულშემატკივრობს, ეს შანსი ჩვენი ერთიანი ბრძოლით უნდა მოვიპოვოთ. მარტის დღეებმა ეს შანსი გააჩინა, ოღონდ ეს ბრძოლა არ დასრულებულა, ან პირიქით, ეს ბრძოლა ახლა დაიწყო. ამიტომ, ერთიანობით, კონსოლიდაციით და პროტესტით ჩვენ მოგვიწევს დავათმობინოთ და შევცვალოთ. ასევე, ყველა იმ ადამიანმა, ვის მიმართაც „ქართულმა ოცნებამ“ დაიწყო დღეს „გაშავების“, სიბინძურის, ზეწოლისა და შანტაჟის კამპანია, მინდა გითხართ, რომ ეს ყველა ეს ფაქტი არის გადაცემული ჩვენი პარტნიორების მიმართ. ისინი ყურადღებით აკვირდებიან უფლებების დაცვას და არ აპირებენ, რომ ამაზე თვალი დახუჭონ. „ქართულ ოცნებაზე“ ზეწოლის ერთ-ერთი საფუძველი იქნება სწორედ ჩვენი თანამოქალაქეების შანტაჟი, რასაც ჩვენ ვხედავთ. თუ ვინმეს ჰგონია, რომ ცალ-ცალკე მოერევიან ამ ხალხს, ძალიან ცდებიან იმიტომ, რომ დღეს ცალ-ცალკე ის მოქალაქეები, ვინც ევროპული მომავლისთვის ვიბრძვით, არ ვართ. ყველა ერთად ვართ და ჩვენს გვერდით არის როგორც ევროპარლამენტი, ასევე აღმასრულებელი ნაწილი“,-განაცხადა ხოშტარიამ.