ნიკოლოზ სამხარაძე - საგარეო საქმეთა სამინისტრო საგარეო პოლიტიკურ კურსს პრაგმატულად წარმართავს
საგარეო ურთიერთობათა კომიტეტის თავმჯდომარის ნიკოლოზ სამხარაძის შეფასებით, საქართველოს საგარეო საქმეთა უწყება საგარეო პოლიტიკურ კურსს პრაგმატულად წარმართავს, რისი დამსახურებაცაა ქვეყნის წარმატებები ამ მიმართულებით, მათ შორის, არაღიარების პოლიტიკის კუთხით, - ამის შესახებ ნიკოლოზ სამხარაძემ პარლამენტში საგარეო საქმეთა მინისტრის ინტერპელაციის წესით მოსმენისას განაცხადა.
მისივე განცხადებით, უკანასკნელი წლების განმავლობაში გვაქვს ძალიან წარმატებული არაღიარების პოლიტიკა.
„მხოლოდ მშრალ ფაქტებს მოგახსენებთ საქართველოს საგარეო პოლიტიკის შესახებ. არასდროს საქართველოს დამოუკიდებლობის აღდგენის დღიდან, საქართველოს არ ჰქონია უკეთესი პოლიტიკური ურთიერთობები თავის სამხრეთელ მეზობლებთან - თურქეთთან, სომხეთთან და აზერბაიჯანთან და დღეს ჩვენ ეს ურთიერთობები გვაქვს უმაღლეს ნიშნულზე.
რაც შეეხება ბელარუსს, საგარეო საქმეთა სამინისტრომ არაერთხელ გააკეთა განცხადება, რომლითაც მან დაგმო ის შეხვედრები, რომლებიც გაიმართა მინსკში, ასევე საპარლამენტო გუნდის მხრიდანაც ასეთი განცხადებები გაკეთდა არა მხოლოდ ქვეყნის შიგნით, არამედ იმ საერთაშორისო ფორუმებზე და საპარლამენტო ასამბლეაზე, სადაც ბელარუსის დელეგაცია იმყოფებოდა კიდეც.
რაც შეეხება ელჩის გამოწვევას, მე მინდა ვკითხო იმ ადამიანებს ვინც ელჩის გამოწვევას უკიჟინებს ჩვენს საგარეო საქმეთა სამინისტროს, იღებენ თუ არა პასუხისმგებლობას ისინი იმაზე, რომ ასეთი ნაბიჯის შემდეგ შეიძლება მოხდეს აფხაზეთის ან ცხინვალის რეგიონის დამოუკიდებლობის აღიარება. ასევე ხაზი მინდა გავუსვა იმას, რომ ჩვენ უკანასკნელი წლების განმავლობაში გვაქვს ძალიან წარმატებული არაღიარების პოლიტიკა და ესეც არის სწორედ საქართველოს საგარეო პოლიტიკური კურსის პრაგმატულად წარმართვის დამსახურება როგორც ჩვენი დიპლომატების, ასევე ჩვენი საპარლამენტო დიპლომატიის მიმართულებით", - განაცხადა ნიკოლოზ სამხარაძემ.
საგარეო ურთიერთობათა კომიტეტის თავმჯდომარემ მადლობა გადაუხადა მინისტრს და მთლიანად მის გუნდს წარმატებული მუშაობისთვის და „იმ რთული სამუშაოსთვის, რომელსაც ისინი აწარმოებენ მიზანმიმართული დეზინფორმაციის კამპანიის ფონზე, რომელიც საქართველოს იმიჯის შელახვას ისახავს მიზნად“.
v-if="article.gallery" v-html="article.gallery"
