ბათუმის უნივერსიტეტს თურქეთის უნივერსიტეტების დელეგაცია ეწვია
ბათუმის შოთა რუსთველის სახელმწიფო უნივერსიტეტს თურქეთის უნივერსიტეტების დელეგაცია ეწვია.
უნივერსიტეტის ინფორმაციით, რეჯეფ თაიფ ერდოღანის უნივერსიტეტის რექტორმა იუსუფ ილმაზმა და არტაანის უნივერსიტეტის რექტორმა მეჰმეთ ბიბერმა ბსუ-ს რექტორთან მერაბ ხალვაშთან და პროფესორ-მასწავლებლებთან გამართულ შეხვედრაზე უნივერსიტეტებს შორის თანამშრომლობის გაღრმავებასა და სამომავლო გეგმებზე იმსჯელეს.
„არტაანის უნივერსიტეტის ინიციატივით თურქეთში დაარსდება საქართველოს კვლევის ცენტრი და 2023 წლის ოქტომბერში ჩატარდება ერთობლივი სამეცნიერო კონფერენცია თემაზე: „გასტრონომიული ტურიზმი“. ასევე დაიგეგმა გაცვლითი პროგრამებისა და სამეცნიერო-საგანმანათლებლო პროექტების განხორციელება.
ვიზიტის ფარგლებში, ბათუმის შოთა რუსთველის სახელმწიფო უნივერსიტეტის რექტორმა მერაბ ხალვაშმა და რეჯეფ თაიფ ერდოღანის უნივერსიტეტის რექტორმა იუსუფ ილმაზმა თანამშრომლობის მემორანდუმს მოაწერეს ხელი”, - ნათქვამია ინფორმაციაში.
