ევროპის რეგიონთა ინსტიტუტის (IRE) დელეგაციის ვიზიტი აჭარაში, პრეზიდენტ დოქტორ ფრანც შაუსბერგერის მეთაურობით, კიდევ ერთი შესაძლებლობაა, ევროპას ვაჩვენოთ თუ რას აკეთებს ჩვენი ქვეყანა, მისი კონკრეტული რეგიონი იმისათვის, რომ ევროპული ოჯახის სრულფასოვანი და ღირსეული წევრი გავხდეთ, - ამის შესახებ აჭარის უმაღლესი საბჭოს თავმჯდომარე დავით გაბაიძემ დელეგაციასთან გამართულ შეხვედრაზე აღნიშნა.

დავით გაბაიძის განცხადებით, გასული წლის ბოლოს აჭარის წარმომადგენლობითი დელეგაცია IRE-ს გენერალურ ასამბლეაში მონაწილეობდა, სადაც ჩვენი რეგიონის პრეზენტაცია გაიმართა და რამდენიმე დღის განმავლობაში, ზალცბურგის მცხოვრებლები, ქალაქის სტუმრები, საინფორმაციო რგოლების მეშვეობით, საქართველოს ეცნობოდნენ.

როგორც სტუმრებმა აღნიშნეს, IRE მზადაა მხარი დაუჭიროს საქართველოს ევროკავშირში გაწევრიანებას, რათა ჩვენმა ქვეყანამ, მისმა რეგიონებმა შეძლონ ისარგებლონ იმ პროექტებითა და ბენეფიტებით, რომლებსაც ევროკავშირი თავის წევრებს სთავაზობს.

„საქართველო ევროპული ქვეყანაა, აჭარა - ევროპული რეგიონი და თქვენი მისწრაფება ევროინტეგრაციისკენ მიზანია, რომლის მიღწევაშიც, მზად ვართ დაგეხმაროთ ჩვენი გამოცდილებითა და შესაბამისი ბერკეტებით“, - აღნიშნა ფრანც შაუსბერგერმა.

„შეხვედრაზე, რომელსაც უმაღლესი საბჭოს ადამიანის უფლებათა დაცვის საკითხთა კომიტეტის თავმჯდომარე - ცოტნე ანანიძე და აპარატის უფროსი - ზურაბ ჭურკვეიძე ესწრებოდნენ, ყურადღება გამახვილდა სამომავლო თანამშრომლობის საკითხებსა და პერსპექტივებზე. სტუმრებმა აჭარის უმაღლესი საბჭოს შენობა დაათვალიერეს, გადაიღეს სამახსოვრო ფოტო და ჩანაწერი დატოვეს შთაბეჭდილებათა წიგნში.

ევროპის რეგიონთა ინსტიტუტის ((IRE) წარმომადგენლობითი დელეგაცია აჭარაში უმაღლესი საბჭოს მოწვევით იმყოფება. დაგეგმილია შეხვედრები აღმასრულებელი ხელისუფლების ხელმძღვანელებთან და სხვა ოფიციალურ პირებთან. დელეგაცია ეწვევა ბსუ-სა და საზღვაო აკადემიას”, - აღნიშნულია აჭარის უმაღლესი საბჭოს გავრცელებულ ინფორმაციაში.