საქართველოს სახალხო დამცველი ლევან იოსელიანი ენგურის ხიდთან, საოკუპაციო ხაზთან იმყოფებოდა. მისი თქმით, ის აპირებს ადგილზე გაეცნოს, რა პრობლემები და ბარიერები ექმნებათ ადამიანებს, რომლებიც ენგურის ხიდს კვეთენ. როგორც იოსელიანმა განმარტა, ამ ადამიანების უფლებრივ მდგომარეობას ძალიან დიდ ყურადღებას უთმობს მთლიანად სახალხო დამცველის ოფისი.

„ჩამოვედი საოკუპაციო ხაზთან. თქვენ იცით, რომ ჩვენ აქტიურად ვმუშაობთ ჩვენი მოქალაქეების უფლებრივ მდგომარეობაზე, რომლებიც მოძრაობენ ენგურის ხიდზე, გადადიან ძირითადად გალში. ჩვენი წარმომადგენელი არის დაკავებული მათი უფლებრივი მდგომარეობით, მონიტორინგით. მე თვითონ მოვედი, რომ ეს ყველაფერი ჩემი თვალით მენახა და მე თვითონ გავსაუბრებოდი ადამიანებს, რომლებიც გადმოდიან და მათგან მიმეღო ინფორმაცია იმის შესახებ, რა ბარიერები აქვთ გადაადგილების, რა პრობლემები ექნებათ, რა პერიოდში და ა.შ. ეს არის ძალიან მნიშვნელოვანი ჩვენთვის, ამას დიდ ყურადღებას ვუთმობთ მთლიანად სახალხო დამცველის ოფისი და კიდევ უფრო მეტად გავაგრძელებთ ამ თვალსაზრისით მათი უფლებების მონიტორინგს“,- განაცხადა იოსელიანმა.