ზუგდიდში, უმაღლესი სასწავლებლის ყოფილ შენობაში შესახლებული დევნილები უკვე მესამე დღეა ნორმალური საცხოვრებელი პირობების მოთხოვნით საპროტესტო აქციას მართავენ. აქციის მონაწილეთა განცხადებით, პროტესტის გაღვივების მიზეზი ელექტროენერგიის გათიშვა გახდა.

მათივე თქმით, დავალიანება 1000 ლარს შეადგენს, რისი გადახდის შესაძლებლობაც დევნილებს არ აქვთ, ხოლო ინდივიდუალური გამრიცხველიანება შენობაში არ არსებობს.

ამ წუთებში აქციის მონაწილეები გზის გადაკეტვას ცდილობენ, თუმცა ადგილზე მობილიზებული სამართალდამცავები ამის საშუალებას არ აძლევენ.

როგორც შეკრებილები აცხადებენ, აღნიშნული პრობლემის და საცხოვრებლით დაკმაყოფილების მოთხოვნით არაერთხელ მიმართეს ადგილობრივ ხელისუფლებას, აფხაზეთის მთავრობას, დევნილთა სააგენტო, თუმცა უშედეგოდ.

დევნილებს ელექტროენერგიის მიწოდება ამ დროისთვის უკვე აღუდგათ, თუმცა შიშობენ, რომ კვლავ გამოურთავენ.