თუ ხელისუფლებამ შესაბამისი და სწორი დასკვნები არ გააკეთა, დიდი ალბათობით, სანქცირება უფრო მკაცრ სახეს მიიღებს და სანქცირებულთა რიცხვი კიდევ გაიზრდება - ამის შესახებ პარტია „ევროპელი დემოკრატების“ თავმჯდომარემ, პაატა დავითაიამ განაცხადა.

მისივე თქმით, დასავლეთის მიერ მიღებული ეს გადაწყვეტილება არის პარტნიორების სრული მხარდაჭერის გამოხატვა ქართველი ხალხის მიმართ.

„ამერიკის შეერთებული შტატების, ჩვენი მთავარი პარტნიორის მიერ მიღებული მკვეთრი გადაწყვეტილება მოსამართლეების სანქცირებასთან დაკავშირებით, ლოგიკურია იმ განცხადებების ფონზე, რაც მთელი ამ პერიოდის განმავლობაში კეთდებოდა სასამართლო რეფორმასთან და ვენეციის კომისიის რეკომენდაციების შეუსრულებლობასთან დაკავშირებით. თუ ხელისუფლებამ შესაბამისი და სწორი დასკვნები არ გააკეთა, დიდი ალბათობით, სანქცირება უფრო მკაცრ სახეს მიიღებს და სანქცირებულთა რიცხვი კიდევ გაიზრდება.

ამ ფონზე, რუსეთის გააქტიურებას საქართველოსთან დაკავშირებით ვხედავთ. განცხადებების გავრცელებით, თითქოს დასავლეთი საქართველოს მეორე ფრონტის გახსნას აიძულებს, რუსეთი ცდილობს შემოატრიალოს ის დემოკრატიული პროცესი, რაც დასავლეთმა ქართველ ხალხთან ერთად დაიწყო. ჩვენს პარტნიორებს მეორე ფრონტის გახსნის მცდელობა დააბრალო, არის სრული აბსურდი, პირიქით, დასავლეთის მხრიდან ხდება მაქსიმალური ხელშეწყობა იმისთვის, რომ გაიზარდოს საქართველოს, როგორც ტრანზიტული ქვეყნის როლი ევროპის უსაფრთხოების საკითხებში. ეს ეხება, როგორც ნავთობპროდუქტების გატარებას, ასევე ელექტროკაბელის განთავსებას შავი ზღვის ფსკერზე, რაც ქვეყნის უსაფრთხოების ერთ-ერთი მთავარი გარანტია, ფაქტობრივად, ბაქო -ჯეიჰანის ნავთობსადენის ტოლფასი პროექტი. თუნდაც, ამ ფაქტორების გათვალისწინებით, საქართველოს საბრძოლო მოქმედებებში ჩართვა შედიოდეს ჩვენი პარტნიორების ინტერესებში არ შეიძლება, შესაბამისად, ამ სახის მოწოდებები არის სრული აბსურდი. ეს არის შიდა პოლიტიკური ნარატივი, რომელსაც რუსეთის სპეცსამსახურები საქართველოს წინააღმდეგ იყენებს, სამწუხაროდ, ამ ნარატივის გავრცელება ხდება საქართველოშიც, რაც ძალიან სახიფათოა.

საქართველოს ხელისუფლებას მოვუწოდებ, შექმნილი სიტუაცია სწორად შეაფასოს, გადადგას მკვეთრი ნაბიჯები ევროკავშირის 12 პუნქტის შესასრულებლად, რომ ქვეყანამ კანდიდატის სტატუსი მიიღოს. ხელისუფლებამ ყველაფერი უნდა გააკეთოს, რომ სანქციების გაცემა საქართველოს მოქალაქეებზე შეჩერდეს, როგორც მოსამართლეებზე, ასევე სხვა თანამდებობის პირებზე.

იმ მოსამართლეებმა, ვისზეც გამოტანილი სანქციები იქნა, პასუხისმგებლობა აიღონ და დაუყოვნებლივ დატოვონ თანამდებობები, რადგან მათი საქმიანობის გაგრძელება სასამართლო სისტემაში ქვეყნის იმიჯს აზიანებს. ხელისუფლებამ კონსულტაციები ოპოზიციურ პარტიებთან უნდა დაიწყოს, საზოგადოებასთან შექმნილი რთული და ჩიხური სიტუაციიდან ქვეყნის გამოყვანისთვის“, - განაცხადა პაატა დავითაიამ.