„სტრატეგია აღმაშენებლის“ ინფორმაციით, პარტიის წევრები ჭიათურის საკრებულოს სხდომას ესწრებიან, რომელზეც „ჭიათურმანგანუმის“ საკითხი იხილება.

როგორც ინფორმაციაშია აღნიშნული, დღის წესრიგის მიხედვით, საკრებულოში კომპანიის მმართველს ელოდებიან, რომელმაც ექვსწლიანი ანგარიში უნდა წარადგინოს.

პარტიის ლიდერის, გიორგი ვაშაძის განცხადებით, რაიონიდან ასობით მილიონი დოლარის მადანი გადის, თუმცა ეს მოსახლეობაზე ეკონომიკურად არ აისახება.

„ჭიათურაში, ეკოლოგიური კუთხით, უმძიმესი ვითარებაა. ასობით მილიონი დოლარის მადანი გადის და ამ რაიონის მოსახლეობას არაფერი არ ეტყობა. გაუბედურებულია ეკოლოგიური მდგომარეობა, ყვირილა შავია. გარდა ამისა, გადათხრილია სოფლები, ძირგამოთხრილია სახლები. ზუსტად დღეს, საკრებულოს სხდომაზე, ადგილობრივმა მოსახლეობამ ეს საკითხები დააყენა. ჩვენ ჩამოვედით, რომ დავესწროთ ამ განხილვას. დღეს მიდის პირდაპირი ძარცვა ამ უმდიდრესი რაიონის. ხალხის გაღარიბება და კონკრეტული ადამიანების გამდიდრება გრძელდება, რაც არის უკანონო, უსამართლო და ამის წინააღმდეგ ჩვენ ყველა უნდა გავერთიანდეთ“, - განაცხადა გიორგი ვაშაძემ.