ლევან ბეჟაშვილის აზრით, სასამართლოსთან დაკავშირებით საგამოძიებო კომისიის შექმნის საკითხის გატანას „ქართული ოცნება“ დღესაც პროცედურული ხრიკებით არ დაუშვებს

ფრაქცია „ერთიანი ნაციონალური მოძრაობის“ თავმჯდომარის მოვალეობის შემსრულებელი, ლევან ბეჟაშვილი ფიქრობს, რომ სასამართლოსთან დაკავშირებით საგამოძიებო კომისიის შექმნის საკითხის გატანას „ქართული ოცნება“ დღესაც პროცედურული ხრიკებით არ დაუშვებს.

როგორც ბეჟაშვილი განმარტავს, ხელისუფლება ყველაფერს აკეთებს იმისთვის, რომ აღნიშნული კომისიის შექმნა არ დაუშვას.

„დღესაც, საპარლამენტო ოპოზიცია 50 წევრის შემადგენლობით, მზადაა მხარი დაუჭიროს საგამოძიებო კომისიის შექმნის საკითხს და ეს ხმების საკმარისი რაოდენობაა, მაგრამ ჩვენ ვხედავთ „ქართული ოცნების“ პოლიტიკურ განაცხადს, რომ ისინი ცდილობენ პოლიტიკური მფარველობა განახორციელონ სასამართლო „კლანზე“ და ყველაფერი გააკეთონ იმისთვის, რომ არ დაუშვან საგამოძიებო კომისიის შექმნის საკითხი. მათ შორის, მიდიან ისეთ რეპუტაციულ ზიანზე, რომელიც გუშინ განიცადეს, როცა საპარლამენტო ისტორიაში პირველად, უმრავლესობა პროცედურულ ომს უწყობდა საპარლამენტო ოპოზიციას, დღესაც პროცედურული ხრიკებით ისინი ცდილობენ ამ საკითხის გატანა არ დაუშვან“, - განაცხადა ბეჟაშვილმა.

რაც შეეხება კითხვას პარტია „საქართველოსთვის“ ინიციატივასთან დაკავშირებით, რომელიც საგამოძიებო კომისიის შექმნას ე.წ. ქოლცენტრებთან დაკავშირებითაც ითვალისწინებს, ბეჟაშვილი პასუხობს, რომ ის „ნებისმიერი საგამოძიებო კომისიის შექმნის საკითხს დაუჭერს მხარს, რომელიც ხელისუფლების დანაშაულებრივ სქემებს გამოავლენს“.

„ქოლცენტრების“ თემა მძიმე დანაშაულია, რომელიც საქართველოში წარმოუდგენელია განხორციელდეს და აეწყოს ხელისუფლების მფარველობის და მონაწილეობის გარეშე. არაერთი მედიამტკიცებულება გავრცელებულა ბოლო პერიოდში, სადაც პირდაპირ სამართალდამცავი ორგანოების ხელმძღვანელები, მათ შორის, დეპუტატები, „ქართული ოცნების“ წინასაარჩევნო კამპანია ფინანსდებოდა „ქოლცენტრებიდან“ შემოსული შემოსავლებით. ამის მტკიცებულება არსებობს, ამიტომ ნებისმიერი საგამოძიებო კომისიის შექმნის საკითხს, მათ შორის პარლამენტში მხარს დავუჭერ, რომელიც გამოავლენს ხელისუფლების დანაშაულებრივ, მფარველობის სქემებს. კეზერაშვილთან დაკავშირებით BBC-ის მიერ გავრცელებული ინფორმაცია აუცილებლად მოხვდება საერთაშორისო სამართლებრივი ინსტიტუციების მხედველობის ქვეშ, მათ შორის, პროკურატურის და სასამართლო ხელისუფლების. დარწმუნებული ვარ, ყველა კითხვას პასუხი გაეცემა, მაგრამ ჩვენი რეალობიდან გამომდინარე ვიცით, რომ საქართველოში ნებისმიერი ბიზნესის წარმოება, ჯიხურიც რომ გახსნა, „ქართული ოცნების“ კონტროლის გარეშე არ ხდება, ეს ბიზნესმენებმა და საზოგადოებამ ძალიან კარგად იციან. როცა საქართველოში ამ კრიმინალურ სქემაზეა საუბარი, პირდაპირ უნდა ვიგულისხმოთ, რომ ეს ხელისუფლების მიერ ორგანიზებული სისტემაა“, - განაცხადა ბეჟაშვილმა.