თელავის რაიონულმა სასამართლომ ახმეტის მუნიციპალიტეტში, თუშეთში 43 წლის კაცის მკვლელობის ბრალდებით დაკავებულ 36 წლის ჯაბა ქააძეს აღკვეთის ღონისძიების სახით პატიმრობა შეეფარდა.

გადაწყვეტილება მოსამართლე გრიგოლ ვატიტაძემ გამოაცხადა.

სხდომაზე ბრალდების მხარე პატიმრობის გამოყენებას ითხოვდა იმ მოტივით, რომ დაკავებულის მხრიდან არსებობს მიმალვის და მტკიცებულებების განადგურების საფრთხე.

დაცვის მხარე პროკურატურის შუამდგომლობას არ დაეთანხმა. 36 წლის ბრალდებულის ადვოკატები 20 000-ლარიან გირაოს ითხოვდნენ.

მკვლელობა ახმეტის მუნიციპალიტეტში 20 აპრილს მოხდა. შინაგან საქმეთა სამინისტროს მიერ ჩატარებული გამოძიების თანახმად, 20 აპრილს, ახმეტის მუნიციპალიტეტის სოფელ ჭეშოში, ურთიერთშელაპარაკების ნიადაგზე ბრალდებულმა სანადირო თოფიდან გასროლით თანასოფლელს დაზიანებები მიაყენა. მიყენებული დაზიანებების შედეგად დაზარალებული ადგილზე გარდაიცვალა.